जिल्ला प्रशासन कार्यालय रामेछापले चालु आर्थिक वर्षको तेस्रो त्रैमासिक प्रगति विवरण सार्वजनिक गरेको छ । कार्यालयले माघदेखि चैत्र मसान्तसम्म सम्पादन गरेका प्रमुख कार्यहरूको विवरण आफ्नो आधिकारिक वेबसाइटमार्फत सार्वजनिक गरेको हो ।
प्रशासकीय अधिकृत चुडामणि अर्यालका अनुसार सार्वजनिक विवरणमा नागरिकता वितरण, राहदानी सिफारिस र राष्ट्रिय परिचय पत्र दर्ता लगायतका प्रशासनिक कार्यलाई समेटिएको छ ।
तथ्याङ्कअनुसार, तेस्रो त्रैमासिक अवधि (माघ–चैत्र) मा नयाँ नागरिकता (वंशज) तर्फ माघमा ५८८, फागुनमा २६४ र चैत्रमा ३५५ गरी जम्मा १ हजार २०७ जनाले नागरिकता लिएका छन् । साउनदेखि चैत्रसम्मको कूल संख्या ४ हजार ६२ पुगेको छ । त्यस्तै, प्रतिलिपि नागरिकता तर्फ यसै अवधिमा १ हजार २८७ थान वितरण गरिएको विवरणमा उल्लेख छ ।
राष्ट्रिय परिचय पत्र व्यवस्थापनतर्फ माघमा १ हजार २७५, फागुनमा ५८५ र चैत्रमा ८८६ जनाको विवरण दर्ता गरिएको छ । कार्ड वितरणतर्फ भने समीक्षा अवधिमा ८६४ थान परिचय पत्र सम्बन्धित नागरिकलाई प्रदान गरिएको प्रशासकीय अधिकृत अर्यालले जानकारी दिनुभयो । सेवा प्रवाहलाई पारदर्शी र उत्तरदायी बनाउने उद्देश्यले नियमित रूपमा प्रगति विवरण सार्वजनिक गर्ने गरिएको कार्यालयले जनाएको छ ।
