रामेछाप । नेपाली कांग्रेस रामेछापका निवर्तमान सभापति लव श्री न्यौपानेले १५औँ महाधिवेशनमा आफूलाई विजयी गराउन सहयोग गर्ने क्षेत्रीय प्रतिनिधि, क्रियाशील सदस्य, पार्टीका नेता–कार्यकर्ता तथा शुभेच्छुकप्रति धन्यवाद व्यक्त गरेका छन् ।
महाधिवेशन प्रतिनिधिमा निर्वाचित भएपछि न्यौपानेले एक धन्यवाद तथा आभार सन्देश जारी गर्दै आफूलाई विश्वास गरेर मत प्रदान गर्ने सबैप्रति सम्मान व्यक्त गरेका हुन् । उनले आगामी दिनमा पनि सबैको साथ, सहयोग र सुझावलाई निरन्तरता दिने प्रतिबद्धता जनाएका छन् ।
न्यौपानेले महाधिवेशनमा आफूलाई विजयी गराउन अमूल्य मत, साथ र सहयोग प्रदान गर्ने सम्पूर्ण क्षेत्रीय प्रतिनिधि, क्रियाशील प्रतिनिधि, शुभेच्छुक तथा सहयोगीप्रति हार्दिक आभार व्यक्त गरेका छन् ।
उनले आफूलाई विश्वास गरी दिएको मतलाई पार्टीप्रतिको जिम्मेवारीका रूपमा लिएको उल्लेख गर्दै आगामी दिनमा पनि पार्टी संगठन र कार्यकर्तासँग निरन्तर जोडिएर काम गर्ने बताएका छन् ।
न्यौपानेले महाधिवेशनबाट विजयी भएका सम्पूर्ण साथीहरूलाई बधाई तथा सफल कार्यकालको शुभकामना दिएका छन् । साथै, महाधिवेशनमा प्रतिस्पर्धा गरेर पराजित भएका उम्मेदवारहरूको मेहनत, योगदान र लोकतान्त्रिक प्रक्रियामा रहेको सक्रिय सहभागिताको समेत सम्मान गर्दै आगामी राजनीतिक यात्राका लागि शुभकामना व्यक्त गरेका छन् ।
उनले कांग्रेसको आन्तरिक लोकतन्त्रलाई थप सुदृढ बनाउन सबै नेता–कार्यकर्ता एकताबद्ध भएर अघि बढ्नुपर्नेमा जोड दिएका छन् । महाधिवेशन प्रतिनिधिका रूपमा आगामी दिनमा पार्टीको नीति, संगठन सुदृढीकरण र कार्यकर्ताको हितका विषयमा सक्रिय भूमिका निर्वाह गर्ने संकेतसमेत गरेका छन् ।
