मन्थली, ५ बैशाख । जिल्ला सहकारी संघ रामेछापको आयोजनामा शनिबारदेखि सहकारी संस्थाका लागि ३ दिने नेतृत्व विकास तालिम सुरु भएको छ। बागमती प्रदेश सरकार, सहकारी तथा गरिबी निवारण मन्त्रालयको सहकार्यमा सञ्चालन गरिएको उक्त तालिम सहकारीकर्मीहरूको क्षमता अभिवृद्धि गर्ने उद्देश्यले आयोजना गरिएको हो।
तालिमको उद्घाटन मन्थली नगरपालिकाका प्रमुख लव श्रेष्ठले गर्नुभयो। उद्घाटन सत्रलाई सम्बोधन गर्दै नगर प्रमुख श्रेष्ठले सहकारीकर्मीहरू विभिन्न अन्य सामाजिक तथा संस्थागत क्षेत्रसँग समेत जोडिएको उल्लेख गर्दै यस्ता प्रकारका नेतृत्व विकास तालिमले उनीहरूको कार्यक्षमता वृद्धि हुनुका साथै विभिन्न संस्थामा प्रभावकारी रूपमा काम गर्न सहज हुने बताउनुभयो। उहाँले सहकारी क्षेत्रलाई स्थानीय आर्थिक विकासको मेरुदण्डका रूपमा अघि बढाउन दक्ष नेतृत्व आवश्यक रहेकोमा जोड दिनुभयो।
जिल्ला सहकारी संघ रामेछापका अध्यक्ष हिमाल ढुंगेलको अध्यक्षतामा सम्पन्न उद्घाटन कार्यक्रममा जिल्लाका विभिन्न सहकारी संघ–संस्थाका प्रतिनिधिहरूको उपस्थिति रहेको थियो। कार्यक्रममा जिल्ला बचत संघका अध्यक्ष जे एन दाहाल, जिल्ला कृषि सहकारी संघका अध्यक्ष कुमार श्रेष्ठ, जिल्ला सहकारी संघका कोषाध्यक्ष छत्रवीर श्रेष्ठ तथा जिल्ला सदस्य बद्रि नयाँभरेले आ–आफ्ना धारणा राख्दै सहकारी क्षेत्रको सुदृढीकरणका लागि नेतृत्व विकास तालिम महत्वपूर्ण हुने बताएका थिए।
संघका सचिव योगेन्द्र श्रेष्ठका अनुसार तालिममा जिल्लाभरिका विभिन्न सहकारी संस्थाबाट ३० जना सहकारीकर्मीहरूको सहभागिता रहेको छ। सहभागीहरूलाई सहकारी व्यवस्थापन, नेतृत्व क्षमता विकास, वित्तीय अनुशासन, समूह परिचालन तथा संस्थागत सुशासनलगायतका विषयमा प्रशिक्षण दिइनेछ।
तीन दिनसम्म सञ्चालन हुने उक्त तालिमले सहकारी संस्थाहरूलाई अझ व्यवस्थित, पारदर्शी र प्रभावकारी बनाउन सहयोग पुग्ने अपेक्षा गरिएको छ। आयोजकका अनुसार तालिमबाट प्राप्त ज्ञान र सीपलाई व्यवहारमा उतार्न सके सहकारी संस्थाहरूको सेवा प्रवाहमा समेत उल्लेखनीय सुधार आउने विश्वास लिइएको छ।
