रामेछाप । नेपाल पत्रकार महासंघको ७१औँ स्थापना दिवसका अवसरमा रामेछाप शाखाले साेमबार विविध सामाजिक कार्यक्रम सम्पन्न गरेको छ।
दिवसको अवसर पारेर शाखाले जिल्लामा रक्तदान कार्यक्रम आयोजना गर्नुका साथै अस्पतालमा उपचाररत बिरामीहरूलाई फलफूल वितरण गरेको हो। कार्यक्रममा पत्रकारहरू, स्थानीयवासी तथा सरोकारवालाहरूको सक्रिय सहभागिता रहेको थियो।
रक्तदान जस्तो मानवीय सेवामार्फत जीवन बचाउन सहयोग पुग्ने विश्वासका साथ कार्यक्रम गरिएको नेपाल पत्रकार महासंघ रामेछाप शाखाका अध्यक्ष दिपक घिमिरेले बताउनु भयाे । साथै उक्त अबसरमा मन्थलीका तामाकाेसी अस्पताल, मन्थली अस्पताल र रामेछाप सामुदायिक अस्पतालमा उपचारका लागि भर्ना भएका बिरामीहरूलाई फलफूल वितरण गरी उनीहरूको स्वास्थ्य लाभको कामना गरिएको थियो। कार्यक्रमले पत्रकारिता पेशालाई सामाजिक उत्तरदायित्वसँग जोड्ने सन्देश दिएको सहभागीहरूले बताएका छन्।
