रामेछाप जिल्लामा यस वर्षको माध्यमिक शिक्षा परीक्षा (एसईई) मा कुल २ हजार ४ सय ४३ जना विद्यार्थीहरू सहभागी हुने भएका छन्। शिक्षा विकास तथा समन्वय इकाई रामेछापका अनुसार जिल्लाभरका १४ वटा परीक्षा केन्द्रमार्फत विद्यार्थीहरू परीक्षामा सम्मिलित हुन लागेका हुन्।
इकाईका निमित्त कार्यालय प्रमुख उमेश महत्तोले दिएको जानकारीअनुसार कुल परीक्षार्थीमध्ये नियमिततर्फ २ हजार २ सय ६१ जना र ग्रेडवृद्धितर्फ १ सय ८२ जना रहेका छन्। जिल्लाका कुल ८८ वटा विद्यालयहरू यस वर्षको एसईईमा सहभागी हुँदैछन्, जसमा ८५ वटा सामुदायिक र ३ वटा संस्थागत (निजी) विद्यालय रहेका छन्।
क्षेत्रगत विवरणअनुसार सामुदायिक विद्यालयहरूबाट २ हजार १ सय ८२ जना परीक्षार्थीहरू सहभागी हुँदैछन् भने संस्थागत विद्यालयका तर्फबाट ७९ जना विद्यार्थीले परीक्षा दिने तय भएको छ। परीक्षालाई शान्तिपूर्ण, मर्यादित र व्यवस्थित रूपमा सम्पन्न गर्नका लागि आवश्यक सम्पूर्ण तयारीहरू भइरहेको निमित्त कार्यालय प्रमुख महत्तोले बताउनुभयो।
