रामेछाप । रामेछापको हिमाली क्षेत्रस्थित उमाकुण्ड गाउँपालिका–५ को प्रीतिमा पर्ने उर्माखुमा पहिलो पटक यात्रुवाहक बस पुगेपछि स्थानीयवासी उत्साहित बनेका छन्। जनप्रतिनिधिको पहल र समन्वयमा गाउँसम्म बस सेवा विस्तार भएपछि स्थानीयलाई आवतजावतमा ठूलो राहत पुगेको हो।
यसअघि उमाकुण्ड–५ को नासपातीघारीसम्म मात्र बस सेवा पुग्ने गरेको थियो। उर्माखुका बासिन्दालाई बस चढ्नका लागि करिब एक घण्टासम्म पैदल हिँड्नुपर्ने बाध्यता थियो। तर अहिले बाहुनडाँडा र जिदु हुँदै बस सेवा उर्माखुसम्म पुगेपछि गाउँका बासिन्दाले सहज रूपमा सवारी साधन प्रयोग गर्न पाएका छन्।
गाउँमै पहिलो पटक बस पुगेपछि स्थानीयवासीले तामाङ संस्कारअनुसार बसको पूजा गर्दै चालक, सहचालक र जनप्रतिनिधिहरूलाई भव्य स्वागत गरेका थिए। उर्माखुमा तामाङ समुदायको बाहुल्यता रहेको छ।
उमाकुण्ड गाउँपालिका–५ का वडा अध्यक्ष कुलबहादुर बस्नेतका अनुसार भौगोलिक जटिलताका बाबजुद धेरै प्रयासपछि गाउँसम्म बस सेवा सञ्चालन गर्न सफल भएको बताए। उनले अब उर्माखुवासीलाई बस चढ्न लामो दूरी पैदल हिँड्नुपर्ने बाध्यता अन्त्य भएको बताए।
उनका अनुसार वडा सदस्य सोमबहादुर तामाङ र नकुल तामाङको पहल, सहयोग र समन्वयमा उर्माखुसम्म बस सेवा विस्तार गर्न सम्भव भएको हो। अब उक्त रुटमा नियमित रूपमा बस सेवा सञ्चालन गर्ने तयारी भइरहेको उनले जानकारी दिए।
बस सेवा गाउँसम्म पुगेपछि स्थानीयले जनप्रतिनिधिलाई धन्यवाद दिँदै सडकलाई व्यवस्थित रूपमा स्तरोन्नति तथा कालोपत्रे गर्नुपर्ने माग समेत गरेका छन्। गाउँमै बस पुगेपछि बजारसम्म पुग्न, बिरामी ओसारपसार गर्न तथा दैनिक आवश्यक काममा सहजता हुने अपेक्षा स्थानीयले गरेका छन्।
