आगामी प्रतिनिधि सभा सदस्य निर्वाचन २०८२ लाई मध्यनजर गर्दै सम्भावित आकस्मिक घटना तथा घाइतेहरूको तत्काल उपचार व्यवस्थापनका लागि रामेछाप अस्पतालले विशेष तयारी सुरु गरेको छ। अस्पतालले ‘इलेक्सन मेडिकल टास्क फोर्स’ गठन गरी विशेष तयारी सुरु गरेको हो।
निर्वाचन अवधिभर अस्पताल र कार्यक्षेत्र (फिल्ड) मा समेत तत्काल प्रतिकार्य गर्न सक्ने गरी डा. मनिष कुमार आस्तिकको संयोजकत्वमा टास्क फोर्स गठन गरिएको छ। टोलीको वैकल्पिक संयोजकमा डा. परीक्षा दाहाल रहनुभएको छ भने सदस्यहरूमा स्टाफ नर्स बिन्दु रोका, सि.अ.हे.व. ईश्वरीप्रसाद पाठक र कार्यालय सहयोगी रोज बहादुर घिसिङ रहनुभएको छ।
त्यसैगरी, आकस्मिक अवस्थाका लागि वैकल्पिक सदस्यहरूमा स्टाफ नर्स समीक्षा थापा, लादिप्मा राई र इन्दिरा घिसिङलाई तयारी अवस्थामा राखिएको छ। निर्वाचनका क्रममा आइपर्न सक्ने कानुनी प्रक्रिया र स्वास्थ्य परीक्षणलाई मध्यनजर गर्दै मेडिको–लिगलतर्फ मेडिकल अधिकृत डा. मनिला बस्नेतलाई जिम्मेवारी तोकिएको अस्पताल प्रशासनले जनाएको छ।
निमित्त मेडिकल सुपरिटेन्डेन्ट डा. सागर जर्मागरका अनुसार निर्वाचन अवधिमा अस्पतालको आकस्मिक सेवालाई थप सुदृढ बनाइएको छ। अस्पतालले आवश्यक स्वास्थ्य सामग्री, औषधि र दक्ष जनशक्तिलाई २४ सै घण्टा ‘स्ट्यान्डबाई’ राख्ने व्यवस्था मिलाएको छ। निर्वाचनका समयमा हुन सक्ने कुनै पनि अप्रिय घटना वा स्वास्थ्य समस्यालाई तत्काल सम्बोधन गरी नागरिकको जीवन रक्षा गर्नु यस टास्क फोर्सको मुख्य उद्देश्य रहेको अस्पतालले उल्लेख गरेको छ।
