रामेछाप । राष्ट्रिय स्वतन्त्र पार्टी (रास्वपा) ले निर्वाचन आचारसंहिता खुला रूपमा उल्लङ्घन गरेको दाबी गर्दै नेपाली काँग्रेस र नेकपा एमालेले रामेछापका प्रमुख जिल्ला अधिकारी श्याम कृष्ण थापाको ध्यानाकर्षण गराएका छन्।
नेपाली काँग्रेसका सचिव बिनोद कार्की, जिल्ला कार्यसमिति सदस्य सिताराम कार्की र नेकपा एमालेका जिल्ला उपाध्यक्ष होतराज ढकाल प्रमुख जिल्ला अधिकारीको कार्यालयमा पुगेर ध्यानाकर्षण गराएका छन् । उनीहरूले रास्वपाको गतिविधि समेटिएको भिडियो सामग्रीलाई प्रमाणका रूपमा प्रस्तुत गर्दै आचारसंहिता विपरीत प्रचार–प्रसार गरिएको दाबी गरेका छन्।
काँग्रेस र एमालेका नेताहरूका अनुसार रास्वपाले सार्वजनिक स्थानमा निर्वाचन आचारसंहिताविपरीत राजनीतिक गतिविधि सञ्चालन गरेको, प्रचार शैली र भेला आयोजना गर्दा तोकिएका मापदण्डको पालना नगरेको देखिएको छ। यस्ता गतिविधिले निर्वाचनको स्वच्छता र निष्पक्षतामाथि गम्भीर प्रश्न उठाएको उनीहरूको भनाइ छ।
ध्यानाकर्षण पत्रमा हिजो खाँडादेवी गाउँपालिकामा पाइप वितरण गरिएको र आज मन्थली नगरपालिका–१२ गेलुमा घर–घरमा इन्टरनेट वितरण गर्दै नागरिकलाई प्रलोभनमा पार्ने प्रयास गरिएको आरोप लगाइएको छ। साथै घरदैलो अभियानका क्रममा चुनाव चिन्ह घण्टी बजाउँदै हिँड्नु तथा पार्टीको लोगो अंकित ब्याज लगाएर प्रचार गर्नु समेत निर्वाचन आचारसंहिताविपरीत रहेको दाबी गरिएको छ।
ध्यानाकर्षण पत्र बुझ्दै प्रमुख जिल्ला अधिकारी श्याम कृष्ण थापाले उजुरी प्राप्त भएको पुष्टि गर्दै प्रस्तुत भिडियो सामग्रीको अध्ययनपछि निर्वाचन आयोग तथा सम्बन्धित निकायसँग समन्वय गरी आवश्यक कानुनी प्रक्रिया अघि बढाइने बताएका छन्।
यस विषयमा राष्ट्रिय स्वतन्त्र पार्टीको तर्फबाट भने हालसम्म कुनै औपचारिक प्रतिक्रिया सार्वजनिक भएको छैन। प्रशासन र निर्वाचन आयोगको आगामी निर्णयलाई लिएर जिल्लाको राजनीतिक वृत्तमा चासो बढ्दै गएको छ।
