रामेछापको सदरमुकाम मन्थलीमा तीनदिने कृत्रिम बौद्धिकता (एआई) सम्बन्धी तालीम आजबाट सुरु भएको छ। तालीममा जिल्लाका ३२ जना पत्रकारको सहभागिता रहेको छ।
सञ्चार रजिस्टारको कार्यालय, बागमती प्रदेश र नेपाल पत्रकार महासंघको सहकार्यमा तालीम सञ्चालन गरिएको हो। तालीममा पत्रकारितामा एआई प्रविधिको प्रयोग, समाचार संकलन, सम्पादन, तथ्य जाँच तथा डिजिटल माध्यममा एआईको प्रभावबारे सिकाइने जनाइएको छ।
नेपाल पत्रकार महासंघ रामेछापका अध्यक्ष दीपक घिमिरेका अनुसार बदलिँदो प्रविधिसँग पत्रकारहरूलाई अपडेट गराउने उद्देश्यले तालीम आयोजना गरिएको हो। उनले एआईको सही र जिम्मेवार प्रयोगले पत्रकारिताको गुणस्तर बढाउने विश्वास व्यक्त गरे।
तीन दिनसम्म चल्ने तालीमले पत्रकारहरूलाई आधुनिक प्रविधिसँग अभ्यस्त गराउँदै व्यावसायिक क्षमता अभिवृद्धि गर्न सहयोग पुग्ने अपेक्षा गरिएको छ।
