मन्थली ः जिल्ला सदरमुकाम मन्थलीमा पशु वधशाला व्यवस्थित नहुँदा व्यवसायीहरूले तामाकोशी नदिको किनारलाई वधशालाको रूपमा प्रयोग गर्दै आएको छ । वधशालाको रूपमा तामाकोशी नदी प्रयोग भए सँगै नदिको किनार र मदिना बग्ने पानी पनि दूषित बनेको छ ।
जिल्ला सदरमुकाममा दुई दर्जन भन्दा बढी मासु पसल छन् । तर वधशाला व्यवस्थित नहुँदा मासु पसलले चाहेर पनि स्वास्थ्यकर मासु बिक्री गर्न सकेका छैनन् । केही पसलले वधशाला व्यवस्थित गर्न खोजे पनि पर्याप्त हुन सकेको छैन । मासु व्यापारीले तामाकोसी नदी किनारमा पशु बध गर्ने गरेका छन् । मासुमा बालुवा, माटो टाँसिएर खानयोग्य नहुने, बध गर्नासाथ चिसो ठाउँमा राख्न नपाइने समस्या छ । नदी किनारलाई वधशालाका रूपमा प्रयोग गर्दा मन्थली विमानस्थलमा उड्ने विमानमा काग र गिद्ध ठोक्किने जोखिम बढेको छ ।
नदीको पानी समेत दूषित र दुर्गन्धित बनाएको छ । नगरपालिकाले व्यवस्थित वधशाला नबनाइदिएका कारण नदी किनारमै बध गर्न बाध्य भएको मासु व्यवसायी पशुपति शाहीले बताए । उनले भने, ‘गत वर्ष नगरले तीन लाख छुट्टाएको थियो, त्यो पैसा कामै नगरी ‘फ्रिज’ भयो । हामीलाई ठाउँ खोज भन्नुहुन्छ, हामीले कहाँ खोज्ने ।’
तत्कालीन पशु सेवा केन्द्र र मन्थली नगरपालिकाले मन्थली–१ स्थित हाटे चउर नजिकै दश वर्षअघि वधशाला बनाएको थियो । त्यो वधशाला प्रभावकारी रूपमा सञ्चालन हुन सकेन । व्यवस्थित वधशाला नहुँदा सरसफाइ गरी फ्रिजमा मासु राखेर बिक्री गर्न नसकेको मासु व्यवसायी हजारसिं तामाङ बताए । ‘पशु बध गर्ने ठाउँमा न त पानीको सुविधा छ, न त फोहोर विसर्जन गनै ठाउँ नै’, उनले भने, ‘त्यसैले हामीले भुईँमै पशु बध गरेर मासु बेच्ने गरेका छौँ ।’ मन्थली नगरपालिकाका नगर प्रमुख लव श्रेष्ठले पशु वधशाला यसअघि बनाइदिएको तर सदुपयोग नभएको बताए । उनले मासु पसलेहरूसँग लागत साझेदारीमा उपयुक्त स्थान छनौट गर्न सके आगामी आर्थिक वर्षमा व्यवस्थित वधशाला निर्माण गरिने बताए।
