काठमाडौं । स्वास्थ्य तथा जनसंख्या मन्त्रालयको सेवा प्रवाहलाई प्रभावकारी, पारदर्शी र जनउत्तरदायी बनाउन मन्त्री प्रदीप पौडेल र मन्त्रालयका सचिवहरूबीच कार्यसम्पादन करार (Performance Contract) भएको छ।
बुधबार मन्त्रालयमा आयोजित कार्यक्रममा मन्त्री पौडेलले स्वास्थ्य सचिव डा. विकास देवकोटा र प्रशासन सचिव डिल्लीराम शर्मासँग एक वर्षे कार्यसम्पादन सम्झौतामा हस्ताक्षर गरेका हुन्।
समारोहलाई सम्बोधन गर्दै मन्त्री पौडेलले नीतिगत सुधार मात्रै पर्याप्त नभई त्यसको कार्यान्वयनले नागरिकले प्रत्यक्ष अनुभव गर्न पाउनुपर्नेमा जोड दिए। उनले जनताको सन्तुष्टिलाई केन्द्रमा राखेर काम गर्न आग्रह गर्दै परिणाममुखी स्वास्थ्य सेवा नै सरकारको प्राथमिकता हुने स्पष्ट पारे।
“स्वास्थ्य क्षेत्रको अडिट अब सूचकांकले मात्र होइन, सेवाग्राहीले पाउने व्यवहार र सन्तुष्टिले मापन गरिनुपर्छ,” मन्त्री पौडेलले भने, “कामको मूल्याङ्कन प्रतिवेदनमा मात्र होइन, परिणाममा देखिनुपर्छ।”
स्वास्थ्य सचिव डा. देवकोटाले मन्त्रालयले ठोस कार्ययोजना बनाएर लक्ष्यहरू समयमै पूरा गर्ने प्रतिबद्धता व्यक्त गरे। “नागरिकको स्वास्थ्यसँग जोडिएका सेवामा सम्झौता हुँदैन, परिणाम निकाल्न मन्त्रालय दृढ छ,” उनले भने।
त्यसैगरी, प्रशासन सचिव डिल्लीराम शर्माले स्वास्थ्य सेवा चुस्त बनाउन प्रशासनिक सुधारलाई प्राथमिकता दिने बताए। “स्वास्थ्यकर्मीको सरुवा–बढुवा वैज्ञानिक, पारदर्शी र व्यवस्थित हुनेछ। जनशक्ति आवश्यकताअनुसार परिचालन गर्दै करार कार्यान्वयनमा कुनै कमी गरिँदैन,” उनले स्पष्ट पारे।
