निर्वाचनलाई सुरक्षित र शान्तिपूर्ण बनाउने तयारी स्वरूप नेपाली सेनाले रामेछाप जिल्लामा आफ्नो सक्रियता बढाएको छ। फागुन २१ गते हुने प्रतिनिधिसभा सदस्य निर्वाचनका लागि सुरक्षा व्यवस्था मजबुत बनाउन सेनाले हेलिकप्टरमार्फत हवाई गस्ती र ‘माउन्ट/डिसमाउन्ट’ अभ्यास सुरु गरेको हो।
मंगलबार बिहान सेनानी सुवास थापाको नेतृत्वमा हिलदेवी क्षेत्रमा गरिएको यो विशेष अभ्यासको मुख्य उद्देश्य निर्वाचनका बेला आइपर्न सक्ने चुनौतीको सामना गर्न फौजको क्षमता र गतिको परीक्षण गर्नु रहेको छ। कुनै पनि संवेदनशिल स्थानमा छिटो पुगेर सुरक्षा प्रदान गर्नका लागि यस्तो अभ्यास प्रभावकारी मानिन्छ।
हाल रामेछापस्थित खड्ग दल गणले जिल्लाका सबै ९६ वटा मतदान स्थलमा आफ्नो पहुँच पुर्याएको छ। सेनाले स्थलगत गस्ती र सुरक्षात्मक गतिविधिहरूलाई तीव्र पार्दै जिल्लाभर सुरक्षाको बलियो उपस्थिति जनाएको छ, जसले गर्दा सर्वसाधारणले निर्धक्क भएर निर्वाचनमा भाग लिन सक्ने वातावरण बन्ने विश्वास गरिएको छ।
