रामेछाप । स्थानीय कला, संस्कृति तथा मौलिक पहिचानको संरक्षण र प्रवर्द्धन गर्ने उद्देश्यले राष्ट्रिय लोक तथा दोहोरी गीत प्रतिष्ठान नेपाल, रामेछाप शाखाले सनिवार मन्थलीमा झाँकीसहितको सांस्कृतिक र्याली आयोजना गरेको छ।
प्रतिष्ठानको पहिलो जिल्ला अधिवेशनको अवसरमा आयोजित र्यालीमा जिल्लाका विभिन्न जातजातिका मौलिक भेषभूषा, संस्कृति र परम्परालाई झल्काउने आकर्षक झाँकी प्रस्तुत गरिएको थियो। सुनुवार समुदायसहित जिल्लाका विभिन्न समुदायले आफ्नो सांस्कृतिक पहिचान झल्किने झाँकी प्रदर्शन गरेका थिए भने पञ्चेबाजा संरक्षण समितिले मौलिक बाजासहित विशेष प्रस्तुति दिएको थियो।
रामेछाप शाखाकी तदर्थ समितिकी संयोजक कल्पना सुनुवारको अध्यक्षतामा सम्पन्न कार्यक्रममा स्थानीय कला र संस्कृतिको संरक्षणका लागि सबै पक्षको साझा प्रयास आवश्यक रहेकोमा जोड दिइएको थियो। सहभागीहरूले मौलिक संस्कृति नयाँ पुस्तामा हस्तान्तरण गर्दै यसको संरक्षण र प्रवर्द्धनमा निरन्तर लाग्नुपर्ने धारणा व्यक्त गरेका थिए।
कार्यक्रममा राष्ट्रिय स्तरका चर्चित लोक तथा दोहोरी गायक–गायिकाहरूको समेत उल्लेखनीय सहभागिता रहेको थियो। कलाकारहरूले लोकगीत तथा दोहोरीमार्फत नेपाली मौलिक कला र संस्कृतिको संरक्षणमा लोकसंगीतको महत्वपूर्ण भूमिका रहेको बताए।
अधिवेशनको अवसरमा आयोजित झाँकीसहितको र्यालीमा स्थानीयवासी, कलाकार, सांस्कृतिककर्मी तथा विभिन्न संघ–संस्थाका प्रतिनिधिहरूको उल्लेखनीय सहभागिता रहेको कार्यक्रमले जिल्लाको सांस्कृतिक विविधतालाई उजागर गर्नुका साथै स्थानीय कला र संस्कृतिप्रति जनचासो बढाउन महत्वपूर्ण योगदान पुर्याएको आयोजकले जनाएको छ।
