काठमाडौँ, नेपाली कांग्रेसका सभापति गगनकुमार थापाले सर्लाहीका छ जना स्कुले विद्यार्थीलाई निःशुल्क पढाउने व्यवस्था मिलाउनुभएको छ । सर्लाहीको बलरा नगरपालिका, गोडैता नगरपालिका र धनकौल गाउँपालिकाका आर्थिक अवस्था कमजोर भएका जेहेन्दार विद्यार्थीलाई थापाले निःशुल्क अध्ययनको व्यवस्था गर्नुभएको हो ।
ललितपुरमा रहेको एक छात्रावासमा राखेर ती बालबालिकालाई कक्षा १० सम्म आवाससहित पूर्ण निःशुल्क अध्ययन गराइने सभापति थापाले सामाजिक सञ्जालमार्फत जानकारी दिनुभएको छ । क्षमता र इच्छाशक्ति भएर पनि आर्थिक अभावका कारण धेरै दलित तथा विपन्न परिवारका बालबालिकाको पढाइ बीचमै रोकिने अवस्था आउनु दुःखद यथार्थ रहेको उहाँले उल्लेख गर्नुभएको छ । सर्लाही क्षेत्र नम्बर ४ का प्रतिनिधि सभा सदस्यका उम्मेदवारसमेत रहनुभएका नेता थापाले विपन्नताका कारण बालबालिका शिक्षाबाट बञ्चित हुनुपर्ने विद्यमान अवस्थालाई थोरै भए पनि बदल्ने उद्देश्यले आफूले यो सानो पहल सुरु गरेको बताउनुभएको छ ।
यो सत्प्रयासलाई सम्भव तुल्याउन आ-आफ्नो क्षेत्रबाट साथ र सहयोग दिने सम्पूर्ण सहयोगी मनहरूलाई उहाँले विशेष धन्यवाद ज्ञापन गर्नुभएको छ । शिक्षा क्षेत्रमा गरिने यस्ता परोपकारी तथा सहयोगी कार्यहरूलाई आगामी दिनमा पनि थप प्रभावकारी र निरन्तर रूपमा अघि बढाउँदै लैजाने प्रतिबद्धतासमेत सभापति थापाले व्यक्त गर्नुभएको छ ।
