काठमाडौं । नेपाली कांग्रेसका सभापति गगन थापाले संविधान संशोधनजस्तो संवेदनशील विषयलाई हल्का रूपमा लिनु देशका लागि घातक हुन सक्ने बताएका छन्। उनले संविधान संशोधन आवश्यक भए पनि त्यसका संवेदनशील पक्षलाई गम्भीरतापूर्वक बुझेर मात्र अघि बढ्नुपर्ने धारणा व्यक्त गरेका छन्।
पार्टी निकट नेपाल आदिवासी जनजाति महासंघको सम्मेलनलाई काठमाडौंमा सम्बोधन गर्दै सभापति थापाले संविधान कुनै स्थिर दस्तावेज नभई समयअनुसार सुधार, परिमार्जन र आवश्यक संशोधन गर्न सकिने जीवित दस्तावेज भएको बताए। तर संशोधनका क्रममा राष्ट्रिय सहमति, संवैधानिक मूल्य–मान्यता र राजनीतिक संवेदनशीलतालाई बेवास्ता गरिए देश गम्भीर संकटतर्फ जान सक्ने उनको भनाइ थियो।
“संविधान डकुमेन्ट हो। यसमा काम गर्दै जाने, सुधार गर्दै जाने, आवश्यक कुरा थप्ने र समयानुकूल परिवर्तन गर्ने प्रक्रिया स्वाभाविक हो,” थापाले भने, “तर यसभित्रका संवेदनशीलतालाई नबुझी अघि बढ्यौं भने नेपाल कुनै पनि बेला दुर्घटनामा पर्न सक्छ।”
सरकारले संविधान संशोधनको विषयलाई पर्याप्त तयारी र गम्भीरताबिना अघि बढाउन खोजेको आरोप लगाउँदै उनले त्यसले मुलुकलाई अनावश्यक द्वन्द्वतर्फ धकेल्ने जोखिम रहेको बताए। संविधानप्रतिको सरकारको दृष्टिकोण नै चिन्ताजनक रहेको उल्लेख गर्दै उनले लोकतान्त्रिक मूल्य र राष्ट्रिय सहमतिलाई केन्द्रमा राखेर मात्र संशोधनको प्रक्रिया अघि बढाउनुपर्नेमा जोड दिए।
सभापति थापाले संविधानको रक्षा गर्नु सबै राजनीतिक दल र नागरिकको साझा दायित्व भएको उल्लेख गर्दै नेपाली कांग्रेसले संविधानको मर्म, लोकतान्त्रिक अभ्यास र राष्ट्रिय हितको संरक्षणका लागि निरन्तर भूमिका निर्वाह गर्ने बताए। देशलाई कुनै पनि प्रकारको राजनीतिक वा संवैधानिक द्वन्द्वमा जान नदिन सबै पक्ष जिम्मेवार बन्नुपर्ने उनको भनाइ थियो।
यसै क्रममा उनले वर्तमान सरकारको कार्यशैलीप्रति पनि असन्तुष्टि व्यक्त गरे। सरकारमा शासकीय अराजकता बढ्दै गएको आरोप लगाउँदै उनले राज्यका जिम्मेवार निकाय र पदाधिकारीहरूले विधि, प्रक्रिया र संवैधानिक मर्यादाभन्दा बाहिर गएर काम गर्न थालेको टिप्पणी गरे। प्रधानमन्त्री कार्यालयदेखि मन्त्रीहरूका गतिविधिसम्मले सुशासनमाथि प्रश्न उठाएको उनको दाबी थियो।
थापाले लोकतन्त्र, विधिको शासन र संविधानको प्रभावकारी कार्यान्वयन नै मुलुकको स्थायित्व र समृद्धिको आधार भएकाले संविधानसँग जोडिएका विषयमा सबै पक्षले उच्च जिम्मेवारीका साथ व्यवहार गर्नुपर्ने आवश्यकता औंल्याए।
