रामेछापको सदरमुकाम मन्थलीमा एघारौँ उद्योग दिवस अवसरमा उद्योग क्षेत्रको पछिल्लो अवस्था र समाधानका विकल्पबारे आयोजित छलफल तथा अन्तरक्रिया कार्यक्रम सम्पन्न भएको छ। उद्योग तथा वाणिज्य कार्यालय रामेछापले “औद्योगिक वातावरण सुधार—दिगो अर्थतन्त्रको आधार” भन्ने मूल सन्देशसहित आयोजना गरेको कार्यक्रममा जिल्लाका उद्योगी–व्यवसायी, जनप्रतिनिधि तथा सरोकारवाला पक्षको उल्लेख्य उपस्थिति थियो। कार्यक्रममा पछिल्लो समय उद्योग क्षेत्रले भोगिरहेको चुनौती, नीतिगत बेवास्ता र भविष्यका सम्भावनाबारे खुला बहस भएको थियो।
कार्यक्रममा उद्योगी तथा व्यवसायीहरूले विगत केही वर्षयता उद्योग क्षेत्रमा थपिएको संकटबारे आफ्नो अनुभव साझा गरे। भूकम्प, कोभिड–१९ महामारी, आर्थिक मन्दी, आन्दोलन र नीतिगत अस्थिरताले उद्योग–व्यवसायको आधार नै कमजोर बनाएको उनीहरूको भनाइ थियो। ‘समृद्ध राष्ट्रको आधार उद्योग हो’ भन्ने तथ्य बुझिँदासमेत सरकार उद्योगी–व्यवसायीका वास्तविक समस्या पहिचान र समाधानमा गम्भीर नभएको गुनासो पनि उठ्यो। सहभागीहरूले दिगो समाधान तथा व्यावहारिक नीतिगत कदमका लागि सरकारको तत्काल ध्यानाकर्षण गराए ।
यसै अवसरमा उद्योग क्षेत्रमा निरन्तरता, लगनशीलता र योगदान पुर्याउँदै आएका व्यवसायीलाई सम्मान गरिएको थियो। स्थानीय तहमा उद्यमशीलता प्रवर्द्धन गर्न सम्मान कार्यक्रम महत्वपूर्ण माध्यम बन्ने भन्दै उद्योग तथा वाणिज्य कार्यालयले तीन जना नव–युवा उद्यमीलाई विशेष सम्मान प्रदान गर्यो। थापा स्टेशनरी एण्ड सप्लायर्सकी दिक्षा थापा, गुगल प्रिन्ट हाउसकी सिमा मुग्रान्ती र टुटेश्वर कृषि तथा पशुपन्छी फर्मका सुदिप खड्का—यी तीनै युवा कम उमेरमै स्वदेशमै उद्यम सुरू गरी दृढता र साहसका प्रेरणादायी व्यक्तित्वका रूपमा प्रस्तुत भए। सांसद आनन्द कुमार श्रेष्ठलगायत अतिथिहरूले दोसल्ला र डायरी अर्पण गर्दै उनीहरूको योगदानको प्रशंसा गरे।
बागमती प्रदेश सभा सदस्य तथा उद्योग, पर्यटन तथा वातावरण समितिका सभापति आनन्द कुमार श्रेष्ठले कानुनी जटिलताले व्यवसायमा निराशा बढ्दै गएको बताए। प्रदेशले बनाएका कानुन संघीय कानुन आएपछि स्वतः खारेज हुने प्रवृत्तिले व्यवसायमैत्री वातावरण कमजोर भएको उनको भनाइ थियो। उनले उद्योग–व्यवसाय सुचारु गर्न संघीय तहबाटै मूल कानुनलाई परिमार्जन गर्नु अपरिहार्य रहेको उल्लेख गरे।
त्यस्तै, रामेछापका प्रमुख जिल्ला अधिकारी श्यामकृष्ण थापाले व्यवसायीहरू राजस्व संकलन प्रक्रिया र कानुनी जटिलताका कारण ठूलो समस्या झेलिरहेको बताए। नेपालमा धेरै कानुन भएको तर व्यवसाय सहजीकरणका लागि एकीकृत प्रणाली अभावमा व्यवसायी दर्ता र नवीकरणमै अल्झिन बाध्य भएको टिप्पणी गरे। सुरक्षित लगानी वातावरण नहुँदा उद्यमीहरू जोखिम लिन हिच्किचाउने र उद्योग विस्तारमा डराउने अवस्था रहेको उनले बताए।
कार्यक्रमले जिल्लामा संकटग्रस्त अवस्थामा रहेका उद्योग–व्यवसायका समस्यालाई खुलेर उठाउने मात्र होइन, समाधानका लागि सामूहिक पहल आवश्यक रहेको सन्देश पनि दिएको सहभागीहरूको भनाइ थियो ।
