रामेछाप । रामेछाप भित्रने खाद्यन्न बोकेको सवारी साधनमाथी सिन्धुलीको कमलामाई नगरपालीकाले मनलाग्दी रुपमा कर असुली गर्दा रामेछापका व्यवसायीहरु मारमा परेका छन् । पर्साको विरगंज हुँदै रामेछाप तर्फ भित्रने ढुवानीका सवारी साधनलाई कमलामाई नगरपालिकाले नियम विपरित कर लिदै आएको छ । त्यस्तैगरी सिन्धुलीका व्यवसायीहरुले ढुवानीका साधनमा भाडा समेत बढी लिदै आएको रामेछाप उद्योग वाणिज्य संघका कोषाध्यक्ष पवन कठायतले जानकारी दिए ।
उनले भने– बिपि राजमार्गमा नयाँ गिरोह हाबी भएको छ । स्थानीय सरकारले तोकेको कर भन्दा बढी रकम लिने स्थानीय गिरोह सक्रिय भएका कारण रामेछाप प्रवेश गर्ने सवै ढुवानीका साधनले वढी रकम तिरेर सिन्धुली जिल्ला छिचोल्नु पर्ने वाध्यता रहेको छ । स्थानिय निकायले तोकेको भन्दा वढी रकम लिएको भन्ने बिषयमा सम्वन्धीत निकायलाई पटक–पटक जानकारी गराउँदा समेत स्थानिय तहले कुनै वास्ता नगर्दा ठेकेदारसँग स्थानिय तहकै मिलेमतो होकी भन्ने आभाष महसुस भएको कोषाध्यक्ष कठायतले गरे ।
सबै नगरपालिका र गाउँपालिकाहरुले कर भनेर जनता ठग्ने कार्य नगरे पनि सिन्धुलीको कमलामाइ नगरपालिकाको कार्यालयले यस्तो धन्दा चलाउँदा रामेछापका आम व्यवसायीहरु मारमा परेका छन् । स्थानिय उत्पादनलाई कर लगाउने अधिकार स्थानिय तहलाई छ । बिरगंज, बारा लगाएतका जिल्लाहरुबाट आएका सामाग्रीहरु र छिमेकी मुलुक भारत लगायत अन्य देशमा उत्पादन गरि नेपाली कम्पनीले प्याक गरेर बिक्रिको ल्याएको दाल गेडागुडिमा पनि कर भनेर केजिको १ रुपैयाँको दरले कमलामाई नगरपालिकाले कर लिदै आएको छ ।