रामेछापका प्रमुख जिल्ला अधिकारी श्यामकृष्ण थापाले आफ्नो एक वर्षे कार्यकाल शान्ति सुरक्षा कायम गर्न, नागरिक सन्तुष्टि दिलाउन र विपद् व्यवस्थापनमा पूर्ण रूपमा सफल रहेको दाबी गर्नुभएको छ। सप्तरी सरुवा भई जान लाग्नुभएका प्रजिअ थापाले सञ्चारकर्मीहरूसँगको बिदाइ भेटघाटमा जिल्लाको समग्र वस्तुस्थितिको समीक्षा गर्दै यस्तो बताउनुभएको हो। आफ्नो कार्यकालमा ‘जेन्जी’ आन्दोलन र कारागारको सुरक्षा चुनौतीलाई रणनीतिक रूपमा नियन्त्रण गरी जिल्लालाई ठुलो भौतिक क्षति हुनबाट जोगाएको उहाँले उल्लेख गर्नुभयो। निर्वाचन अघि भएका दुईवटा ठुला सडक दुर्घटनामा तत्काल उद्धार तथा हेलिकप्टरमार्फत उपचारको व्यवस्था मिलाइएको र रामेछापको निर्वाचन सुरक्षा मोडललाई देशभरि नै अनुसरण गरिएको उहाँले दाबी गर्नुभयो। “कुनै पनि नेपाली नागरिक नागरिकताबिहीन हुनुहुँदैन” भन्ने मान्यताका साथ प्रमाण खोजेरै नागरिकता र गाउँगाउँमा पुगेर राष्ट्रिय परिचयपत्र वितरण गरिएको प्रजिअ थापाले बताउनुभयो। नागरिक सर्वोच्चतालाई मुख्य मन्त्र मानेर काम गर्दा प्रशासनको सेवा प्रवाहप्रति नागरिक सन्तुष्ट रहेको भन्दै उहाँले सञ्चार जगत् र जिल्लाबासीलाई धन्यवाद दिनुभयो।