सञ्चार तथा सूचना प्रविधिमन्त्री पृथ्वीसुब्बा गुरुङले मेटा कम्पनीलाई सात दिनको अन्तिम अल्टिमेटम दिएका छन् । नेपालमा कानुनीरूपमा दर्ता नभए मेटामाथि प्रतिबन्ध लगाइने उनको चेतावनी छ ।
शुक्रबार राजधानीमा आयोजित राष्ट्रिय सूचना आयोगको विभागस्तरीय अन्तरक्रिया कार्यक्रममा बोल्दै मन्त्री गुरुङले मेटालाई दर्ता हुन पटक–पटक आग्रह गरिए पनि बेवास्ता गरिएको बताए। उनका अनुसार मेटालाई तेस्रोपटक पठाइएको सूचना केही दिनअघि नै सकिएको छ ।
‘अब ७ दिनभन्दा बढी दिन्न,’ मन्त्री गुरुङले दोहोर्याउँदै भने, ‘तीनपटक सूचना दिइसक्यौँ । अब दर्ता नभए प्रतिबन्ध लगाउँछौँ ।’ मन्त्री गुरुङले फेसबुक, म्यासेन्जर, ह्वाट्सएप र इन्स्टाग्रामजस्ता मेटाका सेवाबाट हरेक घण्टा नेपालबाट मेटाको कार्यालयमा हजारौं रुपैयाँ पुगेको दाबी गरे । तर, मेटाले नेपालमा दर्ता नहुनु र कर नतिर्नु अनुचित भएको उनको भनाइ छ ।
‘हाम्रो पैसा त्यसरी लुट्ने ? कर नतिर्ने ? र त्यसका कारण फैलिने गलत सूचनालाई नियन्त्रण नगर्ने,’ मन्त्री गुरुङले प्रश्न गरे ।
उनले मेटाले नेपालको जिडिपीभन्दा आफ्नो आम्दानी ठूलो भएको घमन्ड गर्दै आएको आरोप लगाए । ‘मुलुकको स्वाधीनता पैसामा जोडिँदैन,’ मन्त्री गुरुङले भने । उनका अनुसार हालसम्म नेपालमा टिकटक, भाइबर र वी–टक मात्रै दर्ता भएका छन् । मेटालाई समेत दर्ता प्रक्रियामा आउन आग्रह गर्दै उनले यसलाई सरकारले गम्भीररूपमा लिएको संकेत दिएका छन् ।
