काठमाडौं, ८ भदौ – भुटानमा जारी साफ यू–१७ महिला च्याम्पियनसिपमा नेपालले आज बंगलादेशसँग प्रतिस्पर्धा गर्नेछ। खेल नेपाली समयअनुसार साँझ पौने ६ बजे थिम्पुस्थित चाङ्लिमिथाङ रंगशालामा सुरु हुनेछ।
नेपाल र बंगलादेश दुवैले हालसम्म समान २ खेल खेल्दा १ जित र १ हारको नतिजा निकालेका छन्। नेपाल भारतसँग ७–० ले पराजित भए पनि दोस्रो खेलमा भुटानलाई २–१ ले हराएको थियो। बंगलादेशले पहिलो खेलमा भुटानलाई ३–१ ले पराजित गरे पनि भारतसँग २–० ले हार मानेको थियो।
चार टोली सहभागी प्रतियोगिता डबल राउण्ड रोबिन लिगका आधारमा भइरहेको छ। हाल भारत ६ अंकसहित शीर्ष स्थानमा छ भने समान ३–३ अंक जोडेका बंगलादेश र नेपाल क्रमशः दोस्रो र तेस्रो स्थानमा छन्। आयोजक भुटान अंकविहीन छ। आजै हुने अर्को खेलमा भारतले भुटानसँग प्रतिस्पर्धा गर्नेछ।
