रामेछाप । रामेछापमा पछिल्लो समय व्यावसायिक कालिज पालनतर्फ युवाहरूको आकर्षण बढ्दै गएको छ। यसै क्रममा खाँडादेवी गाउँपालिका–३ भिरपानीका युवा निरोज खड्का कालिज पालन व्यवसायमार्फत आत्मनिर्भर बन्दै उदाहरणीय बनेका छन्।
वैदेशिक रोजगारीको मोह बढिरहेका बेला ३२ वर्षीय खड्काले भने आफ्नै गाउँमा सम्भावना खोज्दै ६ वर्षअघि सानो लगानीबाट कालिज फर्म स्थापना गर्नुभएको हो। सुरुवाती चरणमा सीमित संख्याबाट सुरु गरिएको फर्म अहिले विस्तार हुँदै व्यावसायिक रूपमा अघि बढिरहेको छ।
खड्काले आधुनिक प्रविधिको प्रयोग गर्दै कालिजको दाना, पानी तथा स्वास्थ्य व्यवस्थापनमा विशेष ध्यान दिँदै आउनुभएको छ। यसले उत्पादन वृद्धि हुनुका साथै गुणस्तर कायम राख्न समेत सहयोग पुगेको छ। हाल फर्ममा उत्पादन भएका कालिजहरू स्थानीय बजारमै खपत भइरहेका छन्।
उहाँका अनुसार अहिले फर्ममा ५ सयभन्दा बढी कालिज रहेका छन्। फर्मबाट एउटा भाले कालिज २ हजार ५ सय रुपैयाँ र पोथी कालिज १ हजार ८ सय रुपैयाँमा बिक्री हुँदै आएको छ। कालिज पालनबाट खड्काले मासिक रूपमा राम्रो आम्दानी गर्दै आउनुभएको छ। यसले उहाँलाई आत्मनिर्भर बनाउनुका साथै गाउँका अन्य युवालाई समेत उद्यमशीलतातर्फ प्रेरित गरेको छ।
