सुक्खा मौसमको सुरुवातसँगै रामेछाप जिल्लामा वन डढेलो रोकथाम तथा नियन्त्रणका लागि सचेतना अभियानलाई निकै तीव्रता दिइएको छ। डिभिजन वन कार्यालय रामेछापले स्थानीय समुदाय र वन उपभोक्ता समूहहरूसँगको समन्वयमा वन क्षेत्रमा डढेलो लाग्नै नदिन र सम्भावित आगलागीलाई तत्काल नियन्त्रण गर्न विभिन्न सचेतनामूलक कार्यक्रमहरू सञ्चालन गरिरहेको हो।
डिभिजनल वन अधिकृत उमाशंकर प्रसाद जयसवालका अनुसार, हाल सञ्चालन भइरहेको ुडढेलो सचेतना सप्ताहु अन्तर्गत जिल्लाका विभिन्न स्थानमा सचेतनामूलक पर्चा वितरण, रेडियो तथा अन्य माध्यमबाट श्रव्य सामग्री प्रसारण र विद्यालयहरूमा वन डढेलो सम्बन्धी शिक्षा दिने कार्य भइरहेको छ। अधिकांश डढेलो मानवीय अज्ञानता र लापरबाहीका कारण लाग्ने गरेकाले सचेतनामुलक गतिविधिलाई आगामी दिनमा पनि निरन्तरता दिइने अधिकृत जयसवालले जानकारी दिनुभयो।
वन ऐन २०७६ बमोजिम वनमा जानीजानी आगो लगाउनु गम्भीर र दण्डनीय अपराध भएकाले यस्तो कार्यमा संलग्न हुनेलाई कडा कानुनी कारबाही गरिने चेतावनी समेत कार्यालयले दिएको छ। बहुमूल्य वन सम्पदाको सुरक्षाका लागि सबै नागरिकलाई जिम्मेवार र सचेत बन्न डिभिजन वन कार्यालयले विशेष अपिल गरेको छ।
