रामेछाप । रामेछापको मन्थली नगरपालिका–१ मच्छेडाँडीस्थित मन्थली–रामेछाप सडकखण्डमा स्कुटरले जंगली मृगलाई ठक्कर दिँदा दुई जना घाइते भएका छन्।
आज बिहान मच्छेडाँडीबाट मन्थलीतर्फ आउँदै गरेको बागमती प्रदेश ०२–०६७ प १६२३ नम्बरको स्कुटर अगाडि एक्कासि मृग आएपछि स्कुटर अनियन्त्रित भई मृगलाई ठक्कर दिएको जिल्ला प्रहरी कार्यालय रामेछापले जनाएको छ। ठक्करबाट करिब २० किलोग्राम तौलको जंगली मृग घटनास्थलमै मरेको छ।
दुर्घटनामा स्कुटर चालक रामेछाप नगरपालिका–८ सल्लेका १८ वर्षीय सञ्जीव तामाङ घाइते भएका छन्। उनलाइ मन्थली अस्पतालमा प्रारम्भिक उपचारपछि थप उपचारका लागि काठमाण्डै पठाइएके छ । त्यसैगरी स्कुटरमा पछाडि सवार १० वर्षीय जेसीज तामाङको पेट र टाउकोमा चोट लागेको छ। उनको अवस्था मध्यम रहेको र उपचार भइरहेको प्रहरीले जनाएको छ।
घटनाको जानकारी प्राप्त हुनासाथ जिल्ला प्रहरी कार्यालय रामेछापबाट प्रहरी सहायक हवल्दार रामदिनेश राय यादवको नेतृत्वमा प्रहरी टोली खटिई घटनास्थल सुरक्षित गरिएको थियो। जंगली जनावरको व्यवस्थापनका लागि डिभिजन वन कार्यालय रामेछापको टोली पनि घटनास्थल पुगेको थियो।
दुर्घटनामा संलग्न स्कुटर जिल्ला प्रहरी कार्यालय रामेछापको नियन्त्रणमा रहेको छ। घटनाबारे थप अनुसन्धान भइरहेको जिल्ला प्रहरी कार्यालय रामेछापका सूचना अधिकारी कमल राउतले जानकारी दिनु भएको छ।
