रामेछाप । सदरमुकाम मन्थलीमै पछिल्लो तीनदिन भित्र एकदर्जन घर श्रृखलाबद्ध तरिकाले चोरी भएका छन् । मन्थलीमा मात्रै एकैदिन (आइतवार) राती ७ वटा घरमा चोरी भएको हो । प्रहरीको तालुके अड्डा नजिकै मन्थली नगरपालिका वडा नं १ मच्छेडाँडीका शिक्षक टंकप्रसाद सुबेदीको घरमा चोरी भएको छ । उनी परिवार सहित उपचारको लागि काठमाण्डौं गएको मौका छोपी चोरले घरको ताल्चा फुटाएर घरभित्र रहेको करिव ७ तोला सुन, १ लाख ५० हजार नगद लगाएतका सामाग्रीहरु चोरी गरेर लगेका छन् ।
चोरहरुको समुहले सोही दिन मन्थली नगरपालिका वडा नं १ कै जिबेन्द्र प्रसाद घिमिरेको घर समेत चोरी गरेका छन् । सुवेदीको घरवाट पनि चोरहरुले सुन, नगद लगाएतका सामानहरु लगेका छन् । त्यसैगरी चोरहरुले मन्थली नगरपालिका वडा नं ५ सुनारपानीमा ६ वटा घर चोरेका छन् । सुनारपानीमा व्यवसाय संचालन गर्दै आएका राजेन्द्र कार्कीको पसलवाट २ लाख नगद र पसलका सामानहरु चोरी भएको छ । त्यस्तै सोही वडाका सुमन कार्की र झम्क कार्की लगाएत ६ वटा घरहरुमा चोरहरु भित्र पसि भएको नगद र सुन, चाँदीका गरगघहना चोरी गरेर फरार भएका छन् ।
यसरी दैनिक रुपमा चोरीका घटना बृद्धि हुँदै जादा समेत प्रहरीले अहिलेसम्म कुनै पनि चोर पक्राउ गर्न भने सकेको छैन् । सदरमुकाम मन्थली वरपर नै दैनिक रुपमा चोरीका घटना बढ्दै गएपछि अधिकासं नागरिकहरुमा त्रास बढेको छ । मन्थली १ मच्छेडाँडीका शिक्षक सुबेदीको घर वरवर एकदर्जन घरहरु छन् । त्यस्तो घना बस्ती भएको स्थानमा पनि चोरी हुनु भनेको ज्यादै डरलाग्दो अवस्था भएकाले सबै नागरिकहरु त्रसित हुनु परेकोे मन्थली नगरपालिका वडा नं १ मच्छेडाँडीका ध्रुबप्रसाद सुबेदीले जानकारी दिए ।
उनले भने– अहिले दैनिक जसो चोरीका घटनाहरु भइरहेका छन् । यसवाट समाजमा एक किसिमको त्रास सिर्जना भएको छ । लगातार रुपमा चोरी भएपछि प्रहरीले पनि यस बिषयमा तदारुकताका साथ चोरीमा संलग्न अपराधीलाई प्रक्राउ गरेर सार्वजनिक गर्ने र पिडीतलाई उचित किसिमको क्षतिपूर्तिको तत्काल व्यवस्थापन गर्नुपर्ने बताए ।
एकहप्ता अघि जिल्लाको गोकुलगंगा गाउँपालिकाको ठोसे, रस्नालु, नामाडी, बेताली र र्फपुमा समेत चोरीका घटनाहरु भएका थिए । सो घटनालाई लिएर विभिन्न संचारमाध्यममा समाचारहरु आएपछि प्रहरीले सुराकीको आधारमा केही चोरहरुलाई पक्राउ गर्न सफ भएको छ । ती चोरहरु अहिले प्रहरीको खोरमा पुगेका छन् । अन्य चोरहरुको खोजी कार्य भइरहेको जिल्ला प्रहरी कार्यालय रामेछापले जनाएको छ ।
चोरीको बिषयमा के भन्छ– प्रहरी
पछिल्लो केही दिन यता चोरीका घटनाहरु जिल्लामा बृद्धि हुँदै गएको जिल्ला प्रहरी कार्यालय रामेछापका प्रवक्ता श्रींशकर श्रेष्ठले जानकारी दिए । उनले भने– चोरीका घटनाहरु बढेका छन् । केही चोरीका घटनामा संलग्नलाई प्रहरीले पक्राउ गरी आवश्यक अनुसन्धानमा छौ । बाँकी चोरीका घटनाहरु मध्ये अहिलेसम्म १ (एक) वटा मात्रै निवेदन प्रहरी कार्यालयमा परेको छ । अन्य घर चोरी भएका पिडीतले मौखिक रुपमा घटनाको बिषयमा जानकारी गराएका छन् । प्रहरी चोरी गर्ने समुहलाई प्रक्राउ गर्न प्रयासरत रहे पनि अहिलेसम्म फेला भने पार्न नसकेको प्रवक्ता श्रेष्ठ बताउँछन् ।