आज फागुन २१ अर्थात् प्रतिनिधि सभाको निर्वाचनको दिन । रामेछापमा उत्साहपूर्वक बिहान सात बजेदेखि मतदान सुरु भएको छ । प्रतिनिधि सभामा पाँच वर्षको लागि सक्षम, राम्रा सांसदहरु चुन्न मतदाताहरु उत्साहित भई मतदान प्रक्रियामा सहभागी भएका छन् । जिल्ला निर्वाचन कार्यालय रामेछापका प्रमुख, निर्वाचन अधिकारी नारायण लामिछानले सबै मतदान केन्द्रमा निर्धारित समयमै मतदान प्रक्रिया सुरु भएको बताउनुभयो ।
सुरक्षा व्यवस्था कडा
निर्वाचनको सुरक्षाका लागि दुई हजारभन्दा बढी सुरक्षाकर्मी परिचालन गरिएको छ । शान्तिपूर्ण, भयरहीत र निष्पक्ष निर्वाचनका लागि चारवटै सुरक्षा संयन्त्र परिचालन गरिएको जिल्ला सुरक्षा समितिका संयोजक एवं प्रमुख जिल्ला अधिकारी श्याकृष्ण थापाले बताउनुभयो । प्रमुख जिल्ला अधिकारी थापाले निर्वाचन सुरक्षा योजना कार्यान्वयन गरी निर्वाचनमा शान्तिसुरक्षा कायम राख्ने कार्य भइरहेको बताउनुभयो । अति संवेदनशील मतदानस्थलका मतदान केन्द्रमा सुरक्षा व्यवस्था कडिकडाउ गरिएको बताउनुभयो ।