आसन्न निर्वाचनलाई लक्षित गर्दै जिल्ला निर्वाचन कार्यालय रामेछापले आवश्यक तयारीलाई तीव्रता दिएको छ। जिल्ला निर्वाचन अधिकारी नारायण लामीछानेका अनुसार जिल्लामा मतदान अधिकृत २३०, सहायक मतदान अधिकृत २३०, अन्य कर्मचारी ६८४ र सहयोगी कर्मचारी १३० गरी कुल १ हजार ३७४ जना कर्मचारी आवश्यक पर्नेछन्। उहाँले संघ, प्रदेश र स्थानीय तहका कर्मचारी तथा शिक्षकसमेत गरी २ हजार ७४ जनाको विवरण सङ्कलन गरी मुख्य निर्वाचन अधिकृतसमक्ष पठाइसकिएको जानकारी दिनुभयो। सोही सूचीबाट आवश्यक कर्मचारी छनोट गरिनेछ।समानुपातिक निर्वाचन प्रणालीअन्तर्गत अस्थायी मतदाता नामावली सङ्कलन कार्य सम्पन्न भएको छ।
जिल्लामा २ हजार ४२२ जना अस्थायी मतदाता रहेका छन्। तीमध्ये कारागारमा रहेका १९ जना मतदाता पनि समावेश छन्। आयोगले अस्थायी मतदानका लागि दुई केन्द्र तोकेको छ। एक केन्द्र कारागारभित्र र अर्को सघन सहरी तथा भवन निर्माण कार्यालय परिसरमा सञ्चालन गरिनेछ।
निर्वाचन सामग्री व्यवस्थापनअन्तर्गत आवश्यक सामग्री आयोगबाट प्राप्त भइसकेको र मतपत्र भोलि आइपुग्ने जानकारी प्राप्त भएको जिल्ला निर्वाचन अधिकारी लामीछानेले बताउनुभयो। मतदाता शिक्षा कार्यक्रमसमेत सञ्चालनमा रहेको छ। अनुगमनकर्ता, स्वयंसेवक तथा समन्वयकर्तामार्फत मतदाता शिक्षासम्बन्धी कार्यक्रम सञ्चालन भइरहेको जनाइएको छ। मतदान अधिकृत तथा सहायक मतदान अधिकृतको अन्तिम सूची प्राप्त भएपछि फागुन १२ देखि १४ गतेसम्म मन्थलीमा अभिमुखीकरण कार्यक्रम सञ्चालन गरिने तयारी गरिएको छ।
निर्वाचनलाई स्वच्छ, निष्पक्ष र मर्यादित बनाउन मुख्य निर्वाचन अधिकृतको कार्यालय, जिल्ला प्रशासन कार्यालय, सुरक्षा निकाय तथा अन्य सरोकारवाला निकायसँग आवश्यक समन्वय र सहकार्य भइरहेको उहाँले जानकारी दिनुभयो। जिल्लामा रहेका १७ उम्मेदवारमध्ये हालसम्म ११ जनाले निर्वाचन खर्चका लागि बैंक खाता खोलिसकेको जनाइएको छ। आयोगको निर्देशनअनुसार सबै उम्मेदवारले बैंकिङ माध्यमबाट मात्र खर्च गर्नुपर्ने व्यवस्था गरिएको छ।मतगणना स्थल व्यवस्थापनको तयारीसमेत अघि बढाइएको छ। विगतझैँ यसपटक पनि मतगणना माथिल्लो कार्यालयमै गर्ने योजना रहेको जिल्ला निर्वाचन कार्यालयले जनाएको छ।
