ईश्वर बिश्वकर्माः रामेछापमा प्रतिनिधि सभा निर्वाचनको तयारी अन्तिम चरणमा पुगेको छ । एक प्रतिनिधि सभा रहेको जिल्लामा सुरक्षित, सहज र सफलतापूर्वक निर्वाचन सम्पन्न गर्नको लागि अन्तिम तयारी भइरहेको हो ।
जिल्ला निर्वाचन कार्यालय प्रमुख, निर्वाचन अधिकारी नारायण लामीछानेले निर्वाचन घोषणा भएदेखि नै विभिन्न चरणमा सुरु गरिएको तयारी निर्वाचन आउन पाँच दिन बाँकी रहँदा अन्तिम चरणमा पुगेको बताए ।
उनका अनुसार निर्वाचन कार्यालय र सम्बन्धित कार्यालयहरूले मतदान पूर्व गर्नुपर्ने तयारी तीव्र गतिमा गरिरहेका छन्। यस अन्तर्गत मतदान केन्द्रमा निर्वाचन सम्बन्धी सामाग्री व्यवस्थापन, कर्मचारी र सुरक्षाकर्मी खटनपटन लगायतका कार्य सुरु हुँदै छ । केन्द्रमा तालिम प्राप्त मतदान अधिकृत, सहायक मतदान अधिकृत, सहायक कर्मचारी तथा सहयोगी कर्मचारीलाई निर्वाचन सामाग्री सहित खटाइने निर्वाचन अधिकारी लामिछानेले बताए ।
मतदान केन्द्रमा खटिएका कर्मचारीको भूमिका निर्वाचनमा स्वच्छता, निष्पक्षता र विश्वासनीयता कायम गराई मतदान सम्पन्न गराउने हो । सम्पूर्ण कर्मचारीलाई नियूक्ति पत्रसँगै निर्वाचन सामग्रीहरु हस्तान्तरण गरी पठाइदै छ । उनीहरुले फागुन १८ गते भित्र तोकिएको केन्द्रमा पुगेर आ–आफ्नो जिम्मेवारीको कार्य सम्पादन गर्ने छन् । उनले भने “फागुन २० गतेसम्म मतदान पूर्व गर्नुपर्ने सबै तयारी पूरा भई २१ गते निर्वाचन उत्साहका साथ सम्पन्न हुने छ ।”
खटिएका कर्मचारीले आफ्नो राजनीतिक आस्थालाई बिर्सिएर निष्पक्ष र भयमुक्त वातावरण कायम राख्दै मतदाताले स्वतस्फूर्त मतदान गर्न पाउने व्यवस्था मिलाउने र लक्ष्यअनुरुप निर्वाचन सफल हुनेमा सबैलाई विश्वस्त रहन उनले अनुरोध गरे । जिल्लामा मतदान अधिकृत, सहायक मतदान अधिकृतसहित १ हजार ३ सय ७४ जना कर्मचारी खटिदै छन् ।

यसैगरी निर्वाचनका लागि मतदातालाई दक्ष बनाउने र बदर मत न्यूनीकरण गर्ने उद्धेश्ययले सञ्चालित मतदाता शिक्षा कार्यक्रम जारी रहेको निर्वाचन अधिकारी लामिछानेले बताए । जिल्ला सुरक्षा समितिका संयोजक एवं प्रमुख जिल्ला अधिकारी श्यामकृष्ण थापाले निर्वाचनमा अवाञ्छित तथा आपराधिक गतिविधि हुन नदिन भरपर्दो सुरक्षा प्रबन्ध मिलाइएको सुनाए । उनका अनुसार जिल्लामा दुई हजार बढी सुरक्षाकर्मी परिचालन गरिएको छ ।
निर्वाचनको अन्तिम तयारी भईरहेको बेला उम्मेदवाहरु भने मतदाता फकाउने अन्तिम कसरतमा जुटेका छन् । १८ गते बेलुकादेखि नै मौन अवधि सुरु हुने र प्रचारप्रचारको अवधि दुई दिन मात्र रहेकोले उम्मेदवारहरुले प्रचारप्रसारलाई तीव्र बनाएका हुन् । जिल्लामा राजनीतिक दल र स्वतन्त्र गरी १७ जना उम्मेदवार चुनावी प्रतिस्पर्धामा छन् । सबै उम्मेदवाहरुले शिक्षा, स्वास्थ्य, कृषि, रोजगारी, सडक, पुल लगायतका विषयवस्तुलाई चुनावी एजेण्डा बनाएका छन् । जिल्लामा एक लाख ८७ हजार ९ सय ५२ जनाले मतदान गर्दै छन् ।