रामेछाप । जिल्लामा प्रयाप्त मात्रामा खाद्यान्न उत्पादन नहुँदा रामेछापमा मासिक १० करोड रुपैयाँ बराबरको चामल आयात हुँदै आएको छ ।
रामेछापमा खेती योग्य जमिन भए पनि खाद्यान्न उत्पादनमा वर्षेनी गिरावट आएसँगै चामल, मकै, गहुँ लगाएत खाद्यान्नमा बाहिरी जिल्लाको भर पर्नुपर्ने वाध्यता रहेको छ । अहिले जिल्लामा मासिक २ हजार टन खाद्यान्न आयात हुँदै आएको छ । आयातित सवै खाद्यान्न एक महिनाभित्रै विक्रिवितरण हुँने गरेको छ । अहिले गाउँगाउँमा मोटरवाटो पुगेसँगै तराईका जिल्लाबाट आयातित खाद्यान्न गाउँगाउँ पुग्ने गरेका छन् ।
तराईवाट सिधा सडक मार्ग जोडिएपछि रामेछापमा अहिले जनकपुर, बयलवास, सिराहा, सलार्ही, धनुषा लगाएतका ठाउँवाट चामलहरु आयात हुँदै आएको छ । पछिल्लो समय जिल्लामा बढि मात्रामा सबैको रोजाईमा परेको चामल सोना मन्सुली रहेको श्याम स्र्टोसका प्रोपाइटर श्याम थापाले जानकारी दिए ।
उनले भने– तराईका विभिन्न जिल्लाहरुवाट विभिन्न ब्राण्डका चामलहरु आयात हुने गरेको भएता सबैको रोजाईमा सोना मन्सुली चामल नै पर्ने गरेको छ । पछिल्लो समय जिल्लामा चामल, मकै, चिउराको माग अत्याधिक छ । वजारमा माग अनुसारको खाद्यान्न सामाग्री पुर्याउन समस्या भएको थापाले बताए ।
दुई नगरपालिका र ६ वटा गाउँपालिका गरि ८ वटा स्थानिय तह रहेको रामेछापमा १५ सय ६४.३२ वर्ग कि.मि. क्षेत्रफल रहेकोमा ५० हजार ९ सय ८ हेक्टर क्षेत्रफल खेतियोग्य जमिन रहेको भएता पनि धेरैजसो जमिन बाँझै रहेको कृषि ज्ञान केन्द्र रामेछापका कृषि प्रसार अधिकृत बिवेकानन्द महतले जानकारी दिए ।
उनले भने– भएको खेतियोग्य जमिनमा सिंचाई हुन नसक्नु, धेरैजसो जमिन आकाशे पानीको भर पर्नु पर्ने वाध्यता एकातिर रहेको छ भने अर्कोतिर वैदेशिक रोजगारीमा जाने युवायुवतीको संख्यामा बृद्धि भएसँगै गाउँमा भएका जमिन बाझिने क्रम बढ्दै गएको अधिकृत महतले बताए ।
रामेछापमा २०६८ सालमा गरिएको जनगणना अनुसार २ लाख २ हजार ६ सय ४६ जना जनसंख्या रहेको छ । जिल्लाको जनसंख्या अनुसार कति खाद्यान्न उत्पादन जिल्लामा नै हुन्छ र कति बाहिरी जिल्लाको भर पर्नुपर्छ भन्ने तथ्याङ्क कृषि ज्ञान केन्द्रसँग नभएको सो कार्यालयले जनाएको छ ।
