रामेछाप । आसन्न प्रतिनिधिसभा निर्वाचनलाई लक्षित गर्दै रामेछापमा नेपाली कांग्रेसका उम्मेदवार रामचन्द्र खड्का लाई प्रगतिशील लोकतान्त्रिक पार्टीले सहयोग गर्ने औपचारिक सहमति भएको छ । लोकतान्त्रिक शक्तिहरूबीच भएको समझदारी अनुसार प्रगतिशील लोकतान्त्रिक पार्टीले रामेछापमा कांग्रेस उम्मेदवार खड्कालाई समर्थन गर्दै चुनावी सहकार्य गर्ने निर्णय गरेको हो ।
देश गहिरो राजनीतिक संकट, भ्रष्टाचार, नातावाद, बेरोजगारी र राजनीतिक विकृति–विसंगतिबाट गुज्रिरहेको निष्कर्षसहित लोकतान्त्रिक शक्तिहरू एकजुट हुनुपर्ने आवश्यकता औंल्याउँदै दुवै दलबीच सहमति भएको सहमति पत्रमा उल्लेख छ । यही समझदारीका आधारमा रामेछापमा प्रगतिशील लोकतान्त्रिक पार्टीले आफ्ना प्रत्यक्ष उम्मेदवारलाई निष्क्रिय राखी कांग्रेसका उम्मेदवार रामचन्द्र खड्कालाई जिताउन सक्रिय भूमिका खेल्ने निर्णय गरेको हो ।
सहमति अनुसार प्रगतिशील लोकतान्त्रिक पार्टीका नेता–कार्यकर्तालाई कांग्रेस उम्मेदवार खड्काको पक्षमा चुनाव चिन्ह ‘रुख’मा मतदान गर्न आह्वान गरिनेछ । यसलाई रामेछापमा लोकतान्त्रिक शक्तिको साझा उम्मेदवारका रूपमा खड्कालाई अघि सारिएको राजनीतिक सन्देशका रूपमा लिइएको छ ।
समानुपातिक मतका हकमा भने दुवै दलले आ–आफ्नो पार्टीको चुनाव चिन्हमा मतदान गर्ने सहमति गरेका छन् । यसले एकातर्फ कांग्रेस उम्मेदवारलाई प्रत्यक्षतर्फ मजबुत बनाउने र अर्कोतर्फ पार्टीगत अस्तित्वलाई पनि कायम राख्ने रणनीति अपनाइएको देखिन्छ ।
सहमति पत्रमा प्रगतिशील लोकतान्त्रिक पार्टीका इन्चार्ज कोमल मगर र संयोजक भिमराज चौलागाईं तथा नेपाली कांग्रेसका तर्फबाट उपसभापति लेख बहादुर कार्कीले हस्ताक्षर गरेका छन् ।
राजनीतिक वृत्तमा यो सहकार्यलाई रामेछापमा कांग्रेस उम्मेदवार रामचन्द्र खड्काको चुनावी आधार थप बलियो बनाउने निर्णायक कदमका रूपमा हेरिएको छ ।
