रामेछापमा २५ प्रतिशत मत खस्यो प्रतिनिधिसभा सदस्यको निर्वाचनअन्तर्गत रामेछाप जिल्लामा शान्तिपूर्ण रूपमा मतदान भइरहेको छ। मुख्य निर्वाचन अधिकृतको कार्यालयका अनुसार बिहानैदेखि सुरु भएको मतदानमा मतदाताको उत्साहजनक सहभागिता देखिएको छ भने हालसम्म (दिउसो १ बजेसम्म) जिल्लाभर करिब २५ प्रतिशत मत खसिसकेको छ।प्राप्त विवरणअनुसार अहिलेसम्म जम्मा ४७ हजार ४४७ मत खसेको छ, जुन कुल मतदाता सङ्ख्याको २५ प्रतिशत हो।खसेको मतको विवरण हेर्दा महिलाको तुलनामा पुरुष मतदाताको सहभागिता केही बढी देखिएको छ। हालसम्म २६ हजार ८८३ (करिब २८ प्रतिशत) पुरुष मतदाताले आफ्नो मताधिकार प्रयोग गरेका छन् भने २० हजार ५६४ (करिब २३ प्रतिशत) महिला मतदाताले मतदान गरेका छन्।जिल्लाभरका मतदान केन्द्रमा बिहानदेखि नै शान्तिपूर्ण रूपमा मतदान भइरहेको मुख्य निर्वाचन अधिकृतको कार्यालयले जनाएको छ। निर्वाचनलाई भयरहित र व्यवस्थित बनाउन सुरक्षा व्यवस्था अत्यन्तै कडा पारिएको छ।दिन ढल्किँदै जाँदा मत खसाल्ने मतदाताको सङ्ख्या अझै बढ्ने अपेक्षा गरिएको छ।