मन्थली ।रामेछापको माध्यमिक शिक्षा परीक्षा (एसईई) २०८२ को नतिजा सार्वजनिक गरिएको छ । शिक्षा विकास तथा समन्वय इकाइ, रामेछापले सार्वजनिक गरेको विवरण अनुसार जिल्लाका ८९ सामुदायिक र ३ संस्थागत गरी कूल ९२ विद्यालयका विद्यार्थीहरू परीक्षामा सहभागी भएका थिए ।
सार्वजनिक गरिएको तथ्याङ्क अनुसार परीक्षामा कूल २ हजार २ सय ८० विद्यार्थी सहभागी भएकोमा १ हजार ८ सय ५४ जनाले सफलता प्राप्त गरेका छन् भने ४ सय २६ जना विद्यार्थी नन-ग्रेडेड (एनजी) भएका छन् । जिल्लाको समग्र ग्रेडिङ प्रतिशत ८१.३२ रहेको छ । धारगत रूपमा हेर्दा साधारण धारतर्फ सहभागी २ हजार १ सय ३६ मध्ये ८०.०६ प्रतिशत अर्थात् १ हजार ७ सय १० जना उत्तीर्ण भएका छन् भने प्राविधिक धारतर्फ सहभागी १ सय ४४ जना नै उत्तीर्ण भई शतप्रतिशत नतिजा निकाल्न सफल भएका छन् ।
विद्यार्थीहरूको उपलब्धि स्तरलाई हेर्दा ३.६१ देखि ४.०० जीपीए ल्याउने विद्यार्थीको संख्या २ सय ८६ रहेको छ, जसमा ३६ जनाले ४.० जीपीए प्राप्त गरेका छन् । त्यस्तै, ३.२१ देखि ३.६० जीपीए ल्याउने ४ सय ११ जना, २.८१ देखि ३.२० जीपीए ल्याउने ६ सय २४ जना र २.४१ देखि २.८० जीपीए ल्याउने ४ सय ५७ जना रहेका छन् । २.१ देखि २.४० जीपीए ल्याउनेको संख्या ७६ रहेको छ । प्राप्त नतिजाको विवरणमा इकाइ प्रमुख नेत्र प्रसाद गजुरेलले हस्ताक्षर गरी प्रमाणीकरण गर्नुभएको छ ।
