बिहीबार हुन लागेको प्रतिनिधिसभा सदस्य निर्वाचनका लागि रामेछापमा अस्थायी मतदाताको अन्तिम नामावली टुङ्गो लागेको छ। जिल्ला निर्वाचन कार्यालयका अनुसार यसपटक २ हजार ४२२ जना अस्थायी मतदाताले प्रतिनिधिसभाको समानुपातिक निर्वाचन प्रणालीतर्फ मतदान गर्न पाउनेछन्। यस नामावलीमा जिल्लामा कार्यरत सरकारी कर्मचारी, सुरक्षाकर्मी र जिल्ला कारागारमा रहेका ३९ जना कैदीबन्दीहरू समेत समेटिएका छन्।
निर्वाचन कार्यालय प्रमुख एवं निर्वाचन अधिकारी नारायण लामीछानेका अनुसार निर्वाचनलाई व्यवस्थित बनाउन जिल्लाभर दुई वटा अस्थायी मतदान केन्द्रहरू तोकिएका छन्। उनले मतदानमा खटिने कर्मचारीहरूले आफू खटिएकै केन्द्रबाट मतदान गर्न पाउनेछन् भने अन्य अस्थायी मतदाताका लागि जिल्ला कारागार र सघन सहरी तथा भवन निर्माण कार्यालयमा मतदानको व्यवस्था मिलाइएको जानकारी दिए ।
कैदीबन्दीहरूको मताधिकार सुनिश्चित गर्न कारागारभित्रै मतदान केन्द्रको व्यवस्था गरिएको छ, जहाँ नामावलीमा नाम भएका ३९ जनाले मतदान गर्नेछन्। यसरी रामेछापमा कर्मचारीदेखि कैदीबन्दीसम्म सबैलाई समानुपातिक निर्वाचन प्रक्रियामा सहभागी गराउने तयारी पुरा भएको जिल्ला निर्वाचन कार्यालय रामेछापले जनाएको छ ।
