रामेछाप । रामेछाप जिल्लामा लागूऔषध प्रयोग गर्नेको संख्या बढ्दै गएपछि रामेछापमा दुर्व्यसनको गम्भीर जोखिम बढेको देखिएको जिल्ला प्रहरी कार्यालय रामेछापले जनाएको छ । लागूऔषध दुर्व्यसनी सम्बन्धी मंगलबार जिल्ला प्रशासन कार्यलय मन्थलीमा भएको अन्तर्क्रिया कार्यक्रममा जिल्ला प्रहरी कार्यालय रामेछापका प्रमुख प्रहरी नायव उपरीक्षक भोलाकुमार भट्टलेसाना बालबालिकासमेत लुकीछिपी लागूऔषध सेवन गर्ने गरेको तथ्य फेला पारेको जनाएको छ ।
उनका अनुसार बालबालीका घर–परिवार र विद्यालयले पर्याप्त ध्यान नदिँदा बालबालिका साथी सङ्गतको प्रभावमा लागूऔषधमा फस्ने गरेका छन् । डिएसपी भट्टले अभिभावक र शिक्षकले बालबालिकालाई समयमै सचेत बनाउनुपर्नेमा जोड दिँदै भने, “लागूऔषध प्रयोग गर्नेहरूको संख्या दिनानुदिन बढ्दै गएको छ, त्यसैले आफ्ना बालबालिकाको विशेष ख्याल राख्न आवश्यक छ ।”
उनका अनुसार साथीहरूको सङ्गत, विद्यालयको वातावरण र अभिभावकको चासो अभावले धेरैजसो बालबालिका दुर्व्यसनमा आकर्षित भइरहेका छन् । समस्या रोक्न परिवार र विद्यालय दुवै तर्फबाट सहकार्य आवश्यक रहेको उनले स्पष्ट पारे ।
