रामेछाप, असार १२ । भूमिहीन दलित, सुकुम्बासी र अव्यवस्थित बसोबासीलाई जग्गा दिन र व्यवस्थित बसोबासको व्यवस्था गर्न भूमि समस्या समाधान आयोग, जिल्ला समिति रामेछापले काम तीव्र बनाएको छ। आज मन्थलीमा आयोजना गरिएको पत्रकार सम्मेलनमार्फत आयोगले हालसम्मको प्रगति सार्वजनिक गरेको हो।
आयोगका अध्यक्ष गौतम लामाले जिल्लाभरिबाट ३ हजार १ सय १२ जनाले आयोगमा आवेदन दिएको जानकारी दिए। तीमध्ये १ हजार ७ सय ९१ जनालाई जग्गा स्वामित्व प्रमाणपत्र (निस्सा) वितरण भइसकेको छ। बाँकीको प्रक्रिया चलिरहेको र छिट्टै टुंग्याइने उनले बताए।
पत्रकार सम्मेलनमा आयोगका विज्ञ सदस्य मिलन घिसिङले विस्तृत कार्यपत्र प्रस्तुत गर्दै आयोगको उद्देश्य, प्रक्रिया र हालसम्मको प्रगतिबारे जानकारी गराएका थिए।
रामेछापको मन्थली नगरपालिका वडा नं. २, ३, ४, ५, ९, १०, ११, १२, दोरम्बा शैलुङ गाउँपालिका वडा नं. ३, ४, ५, ७, सुनापति गाउँपालिका वडा नं. १, २, ५ र खाँडादेवी गाउँपालिका वडा नं. ५ बाट भने हालसम्म कुनै पनि आवेदन नपरेको अध्यक्ष लामाले जानकारी दिए।
आयोगले बाँकी वडामा पनि नागरिकलाई सूचित गरेर आवेदन संकलन र आवश्यक प्रक्रिया अघि बढाउने जनाएको छ। पत्रकार सम्मेलनमा आयोगका पदाधिकारी, सरोकारवालाहरू र सञ्चारकर्मीहरूको सहभागिता रहेको थियो।
