नेकपा (एमाले) रामेछापका प्रतिनिधि सभाका उम्मेद्वार माधव ढुङ्गेलले रामेछापलाई ‘एआइ डाटा सेन्टर’को सम्भावित केन्द्रका रूपमा विकास गर्न सकिने भन्दै यसलाई आफ्नो प्रमुख प्राथमिकतामा राखेका छन्।शनिबार मन्थलीमा आयोजित पत्रकार भेटघाटमा बोल्दै उम्मेद्वार ढुङ्गेलले रामेछापको मौसम, भौगोलिक अवस्था र ऊर्जा सम्भावनाका कारण एआइ डाटा सेन्टर निर्माणका लागि अनुकूल रहेको दाबी गरे। प्रारम्भिक चरणमा सम्भाव्यता अध्ययन गरेर डिजिटल पूर्वाधार विकासतर्फ अघि बढ्न सकिने उनको भनाइ थियो।उनले सूचना प्रविधि र डिजिटल अर्थतन्त्रलाई रोजगारी सिर्जनाको नयाँ आधारका रूपमा उल्लेख गर्दै एआइ डाटा सेन्टर स्थापनाले जिल्लामा युवा आकर्षण बढ्ने र स्थानीय अर्थतन्त्र चलायमान हुने बताए। जलविद्युतको प्रचुर सम्भावना भएकाले डाटा सेन्टर सञ्चालनका लागि आवश्यक ऊर्जा सहज रूपमा उपलब्ध हुन सक्ने उनको तर्क छ।साथै, कृषि, पर्यटन र जलविद्युतसँगै प्रविधिलाई विकासको नयाँ मेरुदण्ड बनाउने योजना प्रस्तुत गर्दै ढुङ्गेलले संसद्मा रामेछापका विषयलाई गम्भीरताका साथ उठाउने दाबी गरे। आफू पहिलो पटक प्रत्यक्ष रूपमा जनतामाझ जान लागेको उल्लेख गर्दै उनले ‘एक पटक अवसर दिन्छन् भन्ने विश्वास छ’ भने।