रामेछाप जिल्लाका आठ वटै स्थानीय तह आगामी आर्थिक वर्ष २०८३८४ को नीति, कार्यक्रम तथा बजेट निर्माणको अन्तिम तयारीमा जुटेका छन् । सङ्घीय र बागमती प्रदेश सरकारले आफ्नो बजेट सार्वजनिक गरिसकेको पृष्ठभूमिमा यहाँका दुई नगरपालिका र छ गाउँपालिका आगामी आवको बजेटलाई पूर्णता दिन अहोरात्र खटिएका हुन् ।
संवैधानिक व्यवस्था अनुसार स्थानीय तहले असार १० गतेभित्रै आफ्नो वार्षिक बजेट नगर वा गाउँ सभामा पेस गरिसक्नुपर्ने बाध्यता छ । सोही व्यवस्थालाई पछ्याउँदै जिल्लाका सबै पालिकाले असार १० गतेभित्रै अधिवेशन आह्वान गरी बजेट ल्याउने सुनिश्चितता गरेका छन् ।
लिखु तामाकोशी गाउँपालिकाका उपाध्यक्ष दीपा पाख्रिनले बजेट निर्माणको काम अन्तिम चरणमा पुगेको जानकारी दिनुभयो । उहाँका अनुसार लिखु तामाकोशीले यस पटक उत्पादनमुखी आयआर्जन र पूर्वाधार विकासलाई सँगसँगै लैजाने रणनीति अख्तियार गरेको छ ।
यसै गरी, सुनापति गाउँपालिकाले गाउँ सभाको अधिवेशनमार्फत नीति तथा कार्यक्रम र बजेट ल्याउने तयारी गरेको छ । गाउँपालिका उपाध्यक्ष गीता विष्टले विगतका केही गौरवका आयोजनालाई निरन्तरता दिँदै यस वर्ष थुप्रै नयाँ जनमुखी कार्यक्रमहरू थप गर्न लागिएको उल्लेख गर्नुभयो ।
सङ्घ र प्रदेशको कार्य सञ्चालन ऐन बमोजिम नै दोरम्बा शैलुङ गाउँपालिकाले पनि गाउँ सभाको अधिवेशनबाट नयाँ बजेट ल्याउने गरी तयारीलाई तीव्र पारेको जनाएको छ । उता गोकुलगंगा गाउँपालिकाले पनि असार १० गतेभित्रै नीति तथा कार्यक्रम र बजेट ल्याउने गरी गृहकार्य भइरहेको जानकारी दिएको छ । गाउँपालिका उपाध्यक्ष उषादेवी कार्कीका अनुसार हिमाली भेग र प्राकृतिक स्रोतको प्रचुरता रहेको गोकुलगंगाले यस पटक गुणस्तरीय शिक्षा, स्वास्थ्य सेवामा नागरिकको पहुँच र पर्यावरण अनुकूल पर्यटन पूर्वाधार निर्माणलाई बजेटको केन्द्रमा राखेको छ ।
जिल्लाको सदरमुकाम समेत रहेको मन्थली नगरपालिकाले पनि असार १० गते नै नगर सभामा बजेट पेस गर्ने गरी सम्पूर्ण आन्तरिक तयारी पूरा गरेको छ । मन्थली नगरपालिकाका नगर उपप्रमुख ईश्वरी बस्नेतले नगरको सन्तुलित विकासका लागि केही पुरानै योजनालाई निरन्तरता दिँदै यस वर्ष मुख्य रूपमा सहरी सुदृढीकरण, फोहोरमैला व्यवस्थापन र युवा स्वरोजगारका कार्यक्रमलाई प्राथमिकतामा राखेर बजेटको सिलिङ निर्धारण गरिएको स्पष्ट पार्नुभयो ।
मन्थलीसँगै जोडिएको ऐतिहासिक रामेछाप नगरपालिकाले पनि केही पुराना अधुरा योजना र नयाँ सम्भावना बोकेका कार्यक्रम समेटेर सन्तुलित बजेट ल्याउने गृहकार्य गरिरहेको जनाएको छ । उमाकुण्ड गाउँपालिकाले असार ९ गते नीति तथा कार्यक्रम र १० गते बजेट ल्याउने गरी समय तालिका तय गरेको उपाध्यक्ष सावित्री सुनुवारले जानकारी दिनुभयो ।
यस्तै, खाँडादेवी गाउँपालिकाले पनि बजेटको आवश्यक तयारी गरिरहेको छ । खाँडादेवीले आफ्नो क्षेत्रको भौगोलिक विशिष्टतालाई ध्यानमा राख्दै यस वर्ष पर्यटन र कृषि क्षेत्रलाई विशेष प्राथमिकतामा राखेर बजेट विनियोजन गर्न लागेको जनाएको छ । स्रोतको सीमितताका बाबजुद पनि नागरिकका जनअपेक्षा समेट्ने गरी पालिकाहरू बजेटलाई अन्तिम रूप दिन जुटेका छन् ।
