रामेछाप । भुकम्प गएको सातवर्ष बितिसक्दा पनि रामेछापका एकल महिला र पूर्णरुपमा शारिरीक अपाङ्गता भएका जोखिम व्यक्तिले अझै अनुदान रकम पाउन सकेका छैनन् ।
जिल्ला आयोजना कार्यान्वयन इकाई (स्थानिय पूर्वाधार) का कर्मचारीको चरम लापरबाहीका कारण २०७२ सालको विनाशकारी भुकम्पका कारण घरवार विहिन भएका मध्ये रामेछापका जोखिम वर्गमा परेका १ हजार १ सय १२ लाभग्राहीले सरकारले दिने भनेको अनुदान रकम पाउनबाट वञ्चित भएका हुन् ।
भुकम्पपछि सरकारले तोकेको मापदण्ड अनुसार रामेछापका ८ वटै स्थानिय तहको सिफारिसको आधारमा १ हजार २ सय ६३ घरधुरीलाई जोखिम लाभग्राहीको सूचिमा राखेर जिल्ला आयोजना कार्यान्वयन इकाई (स्थानिय पूर्वाधार)ले सम्वन्धीत मन्त्रालयमा सिफारिस गरेको थियो । कार्यालयले सिफारिस गरेको आधारमा मन्त्रालयले सबै लाभग्राहीको नाम अनुमोदन भएर जिल्लामा पठाएता पनि १ हजार १ सय ५० लाभग्राहीले मात्रै जिल्ला आयोजना कार्यालयमा आएर अनुदान रकमको लागि आवश्यक कागजात पेश गरि सम्झौता गरेका थिए ।
जसमध्ये कार्यालयले जोखिम लाभग्राहीसँग गरेको सम्झौताको आधारमा १ हजार १ सय ५० लाभग्राहीलाई प्रति घर ३ लाखको दरले एकमुष्ठ रकम उपलव्ध गराएको थियो । रकम उपलव्ध गराएपछि सो रकमवाट लाभग्राहीहरुले घर निमार्ण गरे वा गरेनन् जिल्ला आयोजना कार्यालयवाट कुनै अनुगमन समेत नभएको र रकम वितरण गरिएको अभिलेख समेत कार्यालयमा नभएको कार्यालय श्रोतले जनाएको छ ।
पछि सरकारले जोखिम लाभग्राहीलाई थप ५० हजार रुपैयाँ प्रदान गर्न १ हजार १ सय ५० लाभग्राहीलाई रकम जिल्लामा पठाएता पनि जम्मा ३८ जोखिम लाभग्राहीले मात्रै रकम पाएका छन् । जिल्लामा नेपाल रेडक्रस सोसाइटी रामेछाप मार्फत निजी आवास पुनर्निमार्ण भएका रामेछाप नगरपालिकाको वडा नं ५ रामपुर र मन्थली नगरपालिका वडा नं १ मन्थलीमा गरि ३८ लाभग्राहीले उक्त रकम लिएका हुन् ।
भुकम्पपछि एकल महिलालाई सरकारले प्रदान गरेको निजी आवास निमार्णको लागि ३ लाख ५० हजार रुपैयाँ मध्ये एकमुष्ठ ३ लाख रुपैयाँ लगेको भएता पनि पछि सरकारले थप गरेको ५० हजार रुपैयाँ आफ्नो छिमेकी एकम महिलाले अझै पाउन नसकेको उमाकुण्ड गाउँपालिका वडा नं २ बाम्तीका आशाकाजी शेर्पाले जानकारी दिए ।
यसवाहेक रामेछापका रामेछापका १ हजार १ सय १२ जोखिम लाभग्राहीहरुलाई निजी आवास पुनर्निमार्ण गर्न थप गरिएको ५० हजारको दरले पठाएको रकम रामेछापका एकल महिला र अपाङ्गले पाउन नसकेका हुन् । जिल्ला आयोजना कार्यालयवाट प्रभावकारी अनुगमन र जोखिम लाभग्राहीलाई सरकारले थप गरेको रकम लिन आउने सूचना सवै स्थानिय तहसम्म नआएको कारण जोखिम लाभग्राहीले अनुदान रकम लिनबाट वञ्चित हुनु परेको दोरम्वा गाउँपालिकाका प्रवक्ता अम्बिका प्रसाद गजुरेलले जानकारी दिए ।
सरकारले जोखिम लाभग्राहीलाई थप गरेको ५० हजार रकम लिन आउने सूचना सम्वन्धीत स्थानिय तहलाई पठाएता पनि कोही पनि लाभग्राही जिल्ला आयोजना कार्यालयमा सम्र्पक गर्न नआएको जिल्ला आयोजना कार्यान्वयन इकाई (स्थानिय पूर्वाधार) रामेछापका नायव सुब्बा भोजराज गिरीले जानकारी दिए ।
उनले भने– अहिले कार्यालयनै जिल्लाबाट उठन लागेको छ । कार्यालयमा भएका अधिकासं कर्मचारी सरुवा भएर हिडिसकेको अवस्था छ । जोखिम लाभग्राहीले लगेको रकमवाट कती लाभग्राहीले घर निमार्ण गरे कती घर निमार्ण गर्न बाँकी छन भन्ने रेकर्ड समेत यतिखेर कार्यालयमा भेटिन सक्ने अवस्था नभएको नायव सुब्बा गिरीले बताए ।
