तीन बर्ष अबधिमा रामेछापबाट १ सय ५४ जना महिला, बालबालिका र जेष्ठ नागरिक हराएका छन् । हराएका मध्ये अधिकांश भेटिएका छन्, भने चार जना बेपत्ता रहेको जिल्ला प्रहरी कार्यालय रामेछापले जनाएको छ । २०७९/०८० मा ४१ जना २०८०/०८१ मा ४२ जना २०८१/०८२ मा ५४ जना र चालु आवको तीन महिनामा १७ जना हराएका थिए । हराएका ब्यक्तिहरु केही आफैँ घर फर्केका त केहीलाई प्रहरीको सक्रियतामा फेला पारिएको हो ।
प्रहरीको तथ्याङक अनुसार आर्थिक बर्ष २०७९/०८० मा २८ महिला, ८ बालक र ५ बालिका गरी ४१ जना हराएकोमा सबै फेला परेका छन् । २०८०/०८१ मा २९ महिला, ४ बालक, ८ बालिका र १ जेष्ट नागरिक गरी ४२ जना हराएका थिए, ति मध्ये एक जना महिला बाहेक सबै फेला परेका थिए । २०८१/०८२ मा हराउने महिला, बालबालिका र जेष्ठ नागरिकको संख्या बढेर ५४ पुगेको थियो । जसमा ३२ महिला, ५ बालक, १४ बालिका र ४ जेष्ठ नागरिक रहेका थिए । ति मध्ये एकजना महिला अझै बेपता रहेको र बाँखी सबै फेला परेका थिए । चालु आवको तिन महिनामा १७ जना हराएकोमा १३ जना फेला परेका र अरु खोजी कार्य जारी रहेको प्रहरी कार्यालयले जनाएको छ ।
कार्यालयका सूचना अधिकारी, प्रहरी निरीक्षक कौशल न्यौपानेले आफ्नो मान्छे हराएपछि परिवारले आतिएर प्रहरीमा खोजबिनको लागि निवेदन दिने गरेको र हुलियाको आधारमा हराएकाहरुको खाजबिन गर्ने गरिएको बताउनु भयो । मानिस हराउनु दुखद रहेको तर हराएको मान्छे फेरि फेला परि पारिवारिक पुर्नमिलन हुनु सुखद रहेको उहाँले बताउनु भयो । हराएकामध्ये अधिकांश प्रहरीको सक्रियतामा फेला परेका छन्, भने केही भने आफैँ परिवारको सम्पर्कमा आएका सूचना अधिकारी न्यौपानेले जानकारी दिनु भयो ।
उहाँका अनुसार अधिकांश महिला, बालबालिका र जेष्ठनागरिक हराउनमा पारिवारिक समस्या, झैझगडा तथा विवाद प्रमुख रहेका छन्, भने उचित खानपान तथा स्याहार, माया स्नेहका अभावमा पनि व्यक्तिमा नैराश्यता पैदा भएपछि घर छाडेर परिवारबाट टाढिन चाहेपछि बिना जानकारी घरै छाडेर हिड्ने गरेको प्रहरी अनुसन्धानबाट खुलेको छ । त्योसँगै सामाजिक सञ्जालको दुरुपयोग, निराशा, साथीसँगाती, आर्थिक अवस्था कमजोर लगायतका थुप्रै कारण जोडिन्छन् । महिला तथा बालबालिका हराउने क्रम रोक्नका लागि परिवारको भूमिका महत्वपूर्ण भूमिका हुने अधिकारकर्मीहरु बताउँछन् । परिवारका सदस्यलाई सम्मान, माया, उचित स्याहारसुसार गर्नुका साथै उनीहरूको चाहना पूरा गरिदिएमा महिला तथा बालबालिका बेपत्ता हुने क्रम रोकिने प्रहरीको पनि निष्कर्ष छ ।
