रामेछाप । जिल्ला ट्राफिक प्रहरी कार्यालय रामेछापले आर्थिक वर्ष २०८१/८२ को एक वर्षको अवधिमा सवारी कारबाहीबाट ३२ लाख ७८ हजार २ रुपैयाँ राजस्व संकलन गरेको छ। ट्राफिक नियम उल्लङ्घन गर्ने विभिन्न सवारी साधनहरूलाई कारबाही गर्दै सो राजस्व संकलन गरिएको हो।
जिल्ला ट्राफिक प्रहरी कार्यालयका प्रमुख तथा प्रहरी सहायक निरीक्षक सुवासचन्द्र मण्डलका अनुसार १२ महिनाको अवधिमा ३ हजार ३० वटा सवारी साधनहरूलाई ट्राफिक नियम विपरीत संचालन गरेको आरोपमा कारबाही गरिएको हो। तीमध्ये सबैभन्दा धेरै कार, जिप, भ्यान र मोटरसाइकल कारबाहीमा परेका थिए।
कार्यालयको तथ्यांकअनुसार गत साउन महिनामा २४२ वटा सवारी कारबाहीबाट ३६ हजार ५ सय रुपैयाँ राजस्व संकलन भएको थियो भने भदौ महिनामा ३१३ सवारी कारबाहीबाट २ लाख ९३ हजार रुपैयाँ उठाइएको थियो। यस्तै, असोजमा २४१ सवारीबाट २ लाख ७० हजार २ सय, कात्तिकमा २८४ सवारीबाट ३ लाख ३० हजार ५ सय, मंसिरमा २१२ सवारीबाट २ लाख ३० हजार ५ सय, र पुसमा २०९ सवारीबाट २ लाख २५ हजार ५ सय रुपैयाँ राजस्व संकलन गरिएको थियो।
त्यस्तै, माघमा १८९ सवारी कारबाहीबाट २ लाख १ हजार, फागुनमा २१५ सवारीबाट २ लाख ३४ हजार ५ सय, चैतमा २४४ सवारीबाट ३ लाख ३ हजार, वैशाखमा २६५ सवारीबाट ३ लाख १५ हजार, जेठमा ३१९ सवारीबाट ३ लाख ३६ हजार ५ सय र अन्तिम महिनामा असारमा २९७ सवारी कारबाहीबाट ३ लाख १ हजार रुपैयाँ संकलन भएको थियो।
जिल्ला ट्राफिक कार्यालयका अनुसार पछिल्ला वर्षहरूमा सवारी चालक तथा यात्रुहरू ट्राफिक नियममा बढी सचेत भएकोले कारबाहीको सङ्ख्या घटेको छ। कारबाही घटेपछि राजस्व संकलन पनि अघिल्ला वर्षको तुलनामा कमी आएको हो।
विगत तीन आर्थिक वर्षको तुलनामा चालू वर्षमा सबैभन्दा कम सवारी कारबाही र राजस्व संकलन देखिएको छ। आर्थिक वर्ष २०७८/७९ मा ११ हजार ८५० सवारी कारबाहीबाट १ करोड ७ लाख ४५ हजार रुपैयाँ राजस्व संकलन गरिएको थियो। त्यसपछि आर्थिक वर्ष २०७९/८० मा ८ हजार ८०८ सवारीबाट ८० लाख ५९ हजार र २०८०/८१ मा ८ हजार ८०९ सवारीबाट ८१ लाख ४० हजार ५ सय रुपैयाँ राजस्व संकलन गरिएको थियो।
चालू आर्थिक वर्ष २०८१/८२ मा भने कारबाहीमा परेका सवारीको सङ्ख्या घटेर ३ हजार ३० मा झरेको छ। ट्राफिक कार्यालयले यसलाई सकारात्मक संकेतको रूपमा लिँदै नियम पालना गर्ने प्रवृत्ति बढ्नु सुखद पक्ष भएको बताएको छ।
ट्राफिक प्रमुख मण्डलले अब ट्राफिक व्यवस्थापनलाई थप प्रभावकारी बनाउन प्रविधिमैत्री प्रणाली, नियमित ट्राफिक शिक्षा तथा सचेतना कार्यक्रममार्फत नियम पालना गराउने रणनीति अघि बढाइने बताए।
