रामेछाप । स्थानिय तहको निर्वाचन नजिकीदै जाँदा नेपाली काँग्रेस जिल्ला कार्य समिति रामेछापले चुनाव लक्षित कार्यक्रम लिएर जनताको घरदैलोमा जाने भएको छ ।
सरकारले आगामी वैशाख ३० गते देशभर एकैपटक स्थानिय तहको निर्वाचनको मिति घोषणा गरेसँगै नेपाली काँग्रेस रामेछापले “घर–घर जाऔं–नेपाली काँग्रेसलाई जिताऔं” भन्ने मुल नारा लिएर पार्टीलाई भोट माग्न जनताको घरदैलोमा जाने भएको छ । सो कुराको जानकारी नेपाली काँग्रेस रामेछापले बिहिवार जिल्ला सदरमुकाम मन्थलीमा पत्रकार सम्मेलनको आयोजना गरी सहभागीहरुलाई जानकारी गराएको हो ।
पार्टीले आयोजना गरेको पत्रकार सम्मेलनमा नेपाली काँग्रेसका पार्टी प्रवक्ता नारायण बहादुर बोगटीले पार्टी केन्द्रिय कार्यालयले दिएको निर्देशन अनुसार फागुन २९ गतेवाट चैत्र २१ गतेसम्म जिल्लाको ८ वटै स्थानिय तहमा चुनाव लक्षित कार्यक्रम संचालन गर्न लागेको जानकारी दिए । उनले भने– पार्टी केन्द्रिय कार्यालयले फागुन २९ गतेवाट निर्वाचन लक्षित कार्यक्रम संचालन गर्न केन्द्रवाट पार्टी केन्द्रिय सदस्य कुन्दराज काफ्लेलाई पठाइसकेको छ । यता जिल्ला कार्यसमितिले पनि चैत्र ९ गतेदेखी २१ गतेसम्म चुनाव लक्षित कार्यक्रम लिएर सबै स्थानिय तहको टोलवस्तीमा पुग्ने गरी कार्यक्रम तय भइसकेकाले सोही अनुसार कार्यक्रम संचालन गर्ने प्रवक्ता बोगटीले बताए ।
चुनाव लक्षित कार्यक्रम लिएर स्थानिय तहसम्म जान पार्टीका विभिन्न पदाधिकारीहरुको संयोजकत्वमा टोली समेत गठन गरेको छ । जसमा रामेछाप नगरपालिकामा पार्टी उप–सभापति लेखवहादुर कार्की, मन्थली नगरपालिकामा पार्टी सचिव बिनोद कार्कीलाई जिम्मेवारी दिइएको छ । त्यसैगरी खाँडादेवी गाउँपालिकामा पार्टी उप–सभापति नवराज थोकर, गोकुलगंगा गाउँपालिकामा पार्टी सचिव दीपक खड्का, सुनापति गाउँपालिकामा पार्टीका सह–सचिव ध्रुव चौलागाई र लिखु तामाकोशी गाउँपालिकामा पार्टीका सह–सचिव कमल योञ्जन लाई जिम्मेवारी दिइएको छ ।
त्यस्तै दोरम्वा शैलुङ्ग गाउँपालिकामा पार्टीका कोषाध्यक्ष लबवहादुर थापामगर र उमाकुण्ड गाउँपालिकामा पार्टी प्रवक्ता नारायण बहादुर बोगटीलाई संयोजकको रुपमा जिम्मेवारी तोकिएको जनाइएको छ । पार्टीले जिम्मेवारी दिएका सबै संयोजकहरुले कार्यक्षेत्रमा खटिदा उनीहरुसँग अन्य पदाधिकारी र स्थानिय कार्यकर्ताहरुको समेत सक्रिय सहभागीतामा चुनाव लक्षित कार्यक्रम संचालन गर्ने छ ।
पार्टीलाई चलाएमान बनाउन नेपाली काँग्रेस रामेछापको जिल्ला जिल्ला अधिवेशन पछि जिल्लाका ८ वटै स्थानिय तहमा पुगेर पार्टीको नियमित वैठक राख्दै आएको छ । गाउँगाउँमा पार्टीको वैठक राख्दा जनतासँग प्रत्यक्ष भेटघाट हुने र उनीहरुलाई परेको समस्याको र गुनासोको बिषयमा समेत सम्वोधन हुने गरी पार्टीले गाउँगाउँमा बैठक आयोजना गर्दै आएको हो ।