मन्थली, रामेछाप। प्रेस चौतारी नेपाल रामेछापद्वारा स्थापित ‘पुष्पलाल स्मृति राष्ट्रिय पत्रकारिता पुरस्कार–२०८३’ नेपाल प्रेसका प्रधान सम्पादक मातृका पौडेललाई प्रदान गरिएको छ।
प्रेस चौतारी नेपाल रामेछापले ४८औँ पुष्पलाल स्मृति दिवसको अवसरमा बिहीबार मन्थलीमा आयोजित विशेष कार्यक्रममा पौडेललाई नगद रु. २५ हजार, दोसल्ला र प्रशंसापत्रसहित सम्मान गरेको हो। पत्रकारिता क्षेत्रमा पुर्याएको उल्लेखनीय योगदानको कदरस्वरूप उनलाई उक्त पुरस्कार प्रदान गरिएको आयोजकले जनाएको छ।
सोही अवसरमा ‘नेपालको कम्युनिष्ट आन्दोलनमा पुष्पलालको योगदान’ विषयमा अन्तरक्रियात्मक कार्यक्रम समेत आयोजना गरिएको थियो। कार्यक्रममा सहभागी वक्ताहरूले नेपालमा कम्युनिष्ट आन्दोलनको वैचारिक आधार निर्माण तथा लोकतान्त्रिक राजनीतिक संस्कृतिको विकासमा पुष्पलाल श्रेष्ठको महत्वपूर्ण भूमिका रहेको चर्चा गरेका थिए।
वक्ताहरूले पुष्पलालले प्रतिपादन गरेका सिद्धान्त, विचार र राजनीतिक मूल्य–मान्यतालाई व्यवहारमा उतार्न सक्ने व्यक्ति नै सच्चा कम्युनिष्ट हुने धारणा व्यक्त गरेका थिए। उनीहरूले वर्तमान राजनीतिक नेतृत्वले पनि पुष्पलालको विचारलाई आत्मसात् गर्दै जनताको हितमा काम गर्नुपर्नेमा जोड दिएका थिए।
कार्यक्रममा विभिन्न राजनीतिक दलका प्रतिनिधि, पत्रकार, बुद्धिजीवी, समाजसेवी तथा प्रेस चौतारी नेपालका पदाधिकारीहरूको सहभागिता रहेको थियो। आयोजकले पुष्पलालको विचार र योगदानलाई नयाँ पुस्तामाझ पुर्याउने उद्देश्यले प्रत्येक वर्ष स्मृति दिवसका अवसरमा यस्ता कार्यक्रम तथा पत्रकारिता पुरस्कार प्रदान गर्दै आएको जनाएको छ।
