रौतहट – फतुवा विजयपुर नगरपालिकामा भएको अनियमितता र भ्रष्टाचारबारे समाचार लेख्ने क्रममा पत्रकार कृष्ण तिवारीमाथि दुर्व्यवहार भएको प्रकरणमा उपमेयर अम्बेया खातुनका छोरा मोहम्मद सनाउल्लाहविरुद्ध जिल्ला अदालत रौतहटले पक्राउ पुर्जी जारी गरेको छ।

इलाका प्रहरी कार्यालय विजयपुरले गरेको अनुरोधमा अदालतले सनाउल्लाहलाई पक्राउ गर्न आदेश दिएको र खोजतलासका लागि छुट्टै प्रहरी टोली परिचालन गरिएको प्रमुख इन्स्पेक्टर सुरेन्द्र यादवले जानकारी दिएका छन्। घटनाक्रम अनुसार, तिवारी साउन ३० गते नगरसभा कार्यक्रममा सहभागी हुन जाँदै गर्दा सन्तपुर चौक नजिकै रोकेर दुर्व्यवहार गरिएको थियो।

पीडित तिवारीको जाहेरीका आधारमा रौतहट प्रहरी प्रमुख एसपी नेत्रमणि गिरीको निर्देशनमा इलाका प्रहरी कार्यालय विजयपुरले गत आइतबार सनाउल्लाहमाथि अभद्र व्यवहार सम्बन्धी मुद्दा दर्ता गरेको थियो।

२०७९ सालको स्थानीय निर्वाचनमा नेपाली कांग्रेसबाट गोपाल प्रसाद यादव मेयर र अम्बेया खातुन उपमेयर निर्वाचित भएका थिए। तर यादव दोषी ठहरिएपछि खातुन कार्यवाहक बनेकी थिइन्। त्यसयता उनका श्रीमान् महमद सेराजको हस्तक्षेपले नगरको कामकाज अस्तव्यस्त बनेको भन्दै जनप्रतिनिधिहरू असन्तुष्ट हुँदै आएका छन्।