२० फागुन, वीरगञ्ज । प्रतिनिधिसभा निर्वाचनको पूर्वसन्ध्यामा नेपाल कम्युनिस्ट पार्टी (नेकपा) का तर्फबाट पर्सा क्षेत्र नम्बर २ का उम्मेदवार मनोज चौधरी पक्राउ परेका छन् ।
नियमित सुरक्षा जाँचका क्रममा वीरगञ्ज महानगरपालिका–बडनिहार क्षेत्रमा चौधरी सवार गाडी रोकेर चौधरीसहित चार जनालाई नियन्त्रणमा लिइएको जिल्ला प्रहरी कार्यालय पर्सा का प्रवक्ता डीएसपी हरि बहादुर बस्नेतले जानकारी दिए ।
प्रहरीका अनुसार गाडीबाट केही शंकास्पद वस्तु समेत फेला परेको छ । सुरक्षा संवेदनशीलतालाई मध्यनजर गर्दै उक्त क्षेत्रलाई केही समयका लागि घेराबन्दी गरिएको थियो । घटनाबारे थप अनुसन्धान भइरहेको र चाँडै पत्रकार सम्मेलनमार्फत विस्तृत जानकारी सार्वजनिक गरिने प्रहरीले जनाएको छ ।
यसैबीच, प्रतिनिधिसभा निर्वाचनको मौन अवधिमा जनता समाजवादी पार्टी नेपाल (जसपा) का सिरहा क्षेत्र नं. ३ का उम्मेदवार अशेश्वर यादव पनि नगदसहित पक्राउ परेका छन् । निर्वाचन आचारसंहितासम्बन्धी विषयमा अनुसन्धान भइरहेको प्रहरीले जनाएको छ ।
