काठमाडौँ । देशकै विशिष्टीकृत महिला स्वास्थ्य संस्था परोपकार प्रसूति तथा स्त्रीरोग अस्पतालले आइतबार विशेष समारोहका बीच ६६औँ वार्षिकोत्सव मनाएको छ। स्वास्थ्य तथा जनसंख्या मन्त्री मोहन बहादुर पौडेलको प्रमुख आतिथ्यतामा सम्पन्न कार्यक्रममा अस्पतालको उपलब्धि, सेवा विस्तार र भविष्यका योजना सार्वजनिक गरियो।
वि.सं. २०१६ सालमा ४० शैय्याबाट सुरु भएको प्रसूति गृह हाल ४८९ शैय्या पुगेको छ। गत आर्थिक वर्षमा मात्रै करिब २१ हजार प्रसूति गराइएको र २ लाख ३३ हजारभन्दा बढीले बाहिरंग सेवा लिएको अस्पतालको वार्षिक प्रतिवेदनमा उल्लेख छ।
मन्त्री पौडेलले मातृ–शिशु स्वास्थ्य सुधारमा अस्पतालले खेलेको योगदानको प्रशंसा गर्दै भने, “प्रसूति गृह केवल अस्पताल मात्र होइन, लाखौं आमा र शिशुको जीवनसँग जोडिएको राष्ट्रिय धरोहर हो।” उनले आईभीएफ सेवा पुनः सञ्चालन, नियोनेटल स्क्रिनिङ र मिल्क बैंकलाई स्वास्थ्य क्षेत्रमा अनुकरणीय उपलब्धि बताए।
भविष्यमा अस्पताललाई ५०० शैय्यासम्म विस्तार गर्ने र उपत्यकाको चाप कम गर्न काठमाडौंका दुई नगरपालिकामा २५–२५ शैय्याका स्याटेलाइट प्रसूति अस्पताल निर्माण गर्ने तयारी गरिएको मन्त्री पौडेलले जानकारी दिए।
समारोहमा अस्पताल निर्देशक श्रीप्रसाद अधिकारीले स्त्रीरोग शल्यक्रियामा दुरबिन प्रविधि, मानसिक स्वास्थ्य ओपीडी र फेटल–मेटर्नल इको सेवाले सेवा स्तर सुधार गरेको जानकारी दिए। उनका अनुसार भूकम्पपछि रोकिएको सरकारी आईभीएफ सेवा पुनः प्रभावकारी रूपमा सञ्चालनमा ल्याइएको छ, जसले निःसन्तान दम्पतीलाई राहत दिएको छ।
अस्पतालले लैंगिक हिंसा पीडित, दुर्गम महिलाका लागि हवाई उद्धारपछिको उपचार तथा विपन्न वर्गका लागि निःशुल्क उपचारजस्ता सामाजिक उत्तरदायित्वका कार्यक्रमलाई निरन्तरता दिइरहेको छ।
