सरकारी बजेट सिध्याउन र भित्तामा झुन्ड्याउने प्रमाणपत्र बाँड्न मात्रै तालिम गरिन्छ भन्ने आम बुझाइलाई रामेछापको सुनापति गाउँपालिकाले चिरेको छ। गाउँपालिकाले आयोजना गरेको युवा लक्षित हलुका सवारी चालक तालिमको परिणाम दुरुस्तै देखियो, जहाँ तालिम सकिदासम्म १५ जना युवाहरूले सवारी चालक अनुमतिपत्र लाइसेन्स नै हात पारिसकेका छन्। बाँकी सहभागीहरू पनि लाइसेन्स लिने अन्तिम प्रक्रियामा हुनुले यो तालिम औपचारिकतामा मात्र सीमित नभई पूर्ण रूपमा परिणाममुखी भएको पुष्टि गर्छ। गत वैशाख १५ देखि जेठ २५ गतेसम्म शिशिर वसन्त अटो ट्रेनिङ वर्कशपको सहजीकरणमा सञ्चालित यो कार्यक्रमले ग्रामीण युवालाई सोझै स्वरोजगारको सम्भावनासँग जोडिदिएको छ।
गाउँपालिकाका अध्यक्ष ठूलो कान्छा तामाङले युवाहरूलाई आत्मनिर्भर बनाउन पालिकाले सधैं यस्ता व्यावहारिक र रोजगारीमूलक कार्यक्रमलाई प्राथमिकता दिने बताउनुभयो। उपाध्यक्ष गीता विष्टले दक्ष जनशक्ति उत्पादनमा तालिम निकै सफल रहेको बताउनु भयो ।
प्रशिक्षार्थीहरू भीष्मराज चौलागाईं, मनसरा मोक्तान र मनिषा मोक्तानले आफूहरूले व्यावसायिक रूपमै अघि बढ्ने आत्मविश्वास पाएको भन्दै गाउँपालिकाप्रति आभार व्यक्त गरे। १५ जनाको हातमा लाइसेन्स नै पुगिसकेको यो सुखद नतिजाबाट उत्साहित गाउँपालिकाले आगामी दिनमा पनि युवा वर्गको सीप विकास र आत्मनिर्भर समाज निर्माणका लागि थप व्यावसायिक तालिमहरू निरन्तर सञ्चालन गर्ने प्रतिबद्धता जनाएको छ।
तस्बिर ः सुनापति सेरोेफेरो
