१८ औँ गणतन्त्र दिवस २०८३ को अवसरमा आयोजित बागमती प्रदेश स्तरीय खुला निबन्ध लेखन प्रतियोगितामा रामेछापको मन्थली माध्यमिक विद्यालयकी छात्रा रिस्ता कार्कीले द्वितीय स्थान हासिल गर्नुभएको छ। बागमती प्रदेश सरकार, शिक्षा विकास निर्देशनालयद्वारा “गणतन्त्र स्थापनाको १८ वर्ष: कार्यान्वयन र चुनौती” विषयमा आयोजित उक्त माध्यमिक विद्यालय (कक्षा ९–१२) स्तरीय प्रतियोगितामा उहाँले सो सफलता प्राप्त गर्नुभएको हो।
प्रदेशका १३ जिल्लाका प्रतिस्पर्धी छात्रछात्राहरूलाई पछि पार्दै उत्कृष्ट स्थान हासिल गर्न सफल हुनुभएकाेमा मन्थली माध्यमिक विद्यालय परिवारले अत्यन्त गौरवान्वित महसुस गरेको जनाएको छ। यस उल्लेखनीय उपलब्धिले विद्यालयको शैक्षिक गरिमालाई थप उचाइमा पुर्याएको भन्दै विद्यालय प्रशासनले प्रतिभाशाली छात्रा कार्कीलाई हार्दिक बधाई ज्ञापन गर्दै उज्ज्वल भविष्यको शुभकामना व्यक्त गरेको छ।
