रामेछाप, असार ९। रामेछाप जिल्लाको खाँडादेवी गाउँपालिकाले आर्थिक वर्ष २०८२÷८३ का लागि ६५ करोड ८४ लाख ८१ हजार १९५ रुपैयाँको बजेट सार्वजनिक गरेको छ। सोमबार सम्पन्न गाउँसभाको १७औँ अधिवेशनमार्फत बजेट र नीति–कार्यक्रम सार्वजनिक गरिएको हो।
गाउँपालिकाको बजेट अधिवेशनमा उपाध्यक्ष रमा घिसिङले बजेट प्रस्तुत गर्नुभयो भने गाउँपालिका अध्यक्ष ज्ञानकुमार श्रेष्ठले नीति तथा कार्यक्रम सार्वजनिक गर्नुभयो। प्रस्तुत नीति तथा कार्यक्रममा पूर्वाधार निर्माण, सामाजिक सेवा सुदृढीकरण, कृषि उत्पादनमा वृद्धि, शिक्षा र स्वास्थ्यमा लगानी, साथै स्थानीय स्तरमा रोजगारी सिर्जना जस्ता क्षेत्रलाई मुख्य प्राथमिकता दिइएको उल्लेख छ।
गाउँपालिकाले भनेअनुसार, बजेट विनियोजन गर्दा ९ वटै वडाको आवश्यकता, उपलब्ध स्रोत र दीगो विकासको अवधारणालाई ध्यानमा राखिएको छ। योजनाहरू जनतामैत्री, परिणाममुखी र दिगो हुने गरी छनोट गरिएको जनाइएको छ।
पूर्वाधारको क्षेत्रमा सडक, खानेपानी, भवन निर्माण तथा नवीकरणलगायतका योजना अघि सारिनेछ। कृषि क्षेत्रमा स्थानीय उत्पादनमा आधारित अनुदान कार्यक्रम, तालिम, बीउ तथा प्रविधिको पहुँच विस्तार गरिने छ। स्वास्थ्य सेवामा आधारभूत सेवा सुधार, जनशक्ति व्यवस्थापन र सुविधासम्पन्न भवन निर्माणमा बजेट छुट्याइएको छ।
शिक्षा क्षेत्रमा विद्यालय स्तरोन्नति, शैक्षिक सामाग्री वितरण, छात्रवृत्ति तथा शैक्षिक पूर्वाधार निर्माणलाई प्राथमिकता दिइनेछ। साथै, स्थानीय स्तरमै रोजगारी सिर्जना गर्न सीप विकास तालिम तथा स्वरोजगार कार्यक्रम सञ्चालन गरिने गाउँपालिकाले जनाएको छ।
बजेट प्रस्तुत गर्दै उपाध्यक्ष घिसिङले पारदर्शिता, जवाफदेहिता र सुशासनलाई प्राथमिकतामा राखी सबै कार्यक्रम कार्यान्वयन गरिने बताउनुभयो। अध्यक्ष श्रेष्ठले नीति तथा कार्यक्रममा समेटिएका योजनाहरू प्रभावकारी रूपमा कार्यान्वयन गर्न सबै पक्षको सहकार्य आवश्यक भएको धारणा राख्नुभयो।
