काठमाडौँ । “नियमित स्वास्थ्य परीक्षण गरौँ, सम्भावित स्वास्थ्य जोखिमबाट बचौँ” भन्ने नाराका साथ श्रावण २७ देखि ३० गतेसम्म मनमोहन मेमोरियल मेडिकल कलेज तथा शिक्षण अस्पताल, स्वयम्भूमा आयोजित बृहत स्वास्थ्य परीक्षण कार्यक्रम–२०८२ सम्पन्न भएको छ।
चार दिनसम्म सञ्चालन भएको कार्यक्रममा फास्ट फुड व्यवसायमा संलग्न २८१ जना व्यवसायीहरूको Whole Body Check-up गरिएको थियो। कार्यक्रममा फास्ट फुड एसोसिएसन नेपालका अध्यक्ष होमराज श्रेष्ठको अध्यक्षता तथा स्वास्थ्य विभाग प्रमुख एवं कार्यक्रम संयोजक कुमार भण्डारीको संयोजनमा सम्पन्न भएको थियो। कार्यक्रममा संस्थापक, पूर्व अध्यक्ष, सल्लाहकार, कार्यसमिति सदस्य, काठमाडौं, ललितपुर र भक्तपुरका व्यवसायी तथा श्रमिकहरूको उल्लेखनीय उपस्थिति रहेको थियो।
स्वास्थ्य सेवाबाट व्यवसायीहरू प्रत्यक्ष लाभान्वित भएको जानकारी दिँदै महासचिव राकेश श्रेष्ठले अस्पतालप्रति आभार व्यक्त गर्नुभयो।
यसै अवसरमा फास्ट फुड एसोसिएसन नेपाल र मनमोहन मेमोरियल मेडिकल कलेज तथा शिक्षण अस्पतालबीच स्वास्थ्य सेवासम्बन्धी विशेष सम्झौता पनि सम्पन्न भएको छ। सम्झौताअनुसार एसोसिएसनसँग आवद्ध व्यवसायी, रेस्टुरेन्ट सञ्चालक, शेयर सदस्य, परिवारका सदस्य, श्रमिक तथा Fast Fan Nepal बाट सिफारिस प्राप्त व्यक्तिहरूले अस्पतालमा उपलब्ध हुने नियमित स्वास्थ्य परीक्षण, ल्याब, एक्स–रे, ईसीजी, ईकोदेखि आईसीयू, भेन्टिलेटर र अपरेसन सेवासम्ममा विशेष छुट पाउने व्यवस्था गरिएको छ।
सम्झौतामा फास्ट फुड एसोसिएसन नेपालका अध्यक्ष होमराज श्रेष्ठ, उपाध्यक्ष रामकाजी भण्डारी, महासचिव राकेश श्रेष्ठ, सचिव एवं स्वास्थ्य विभाग प्रमुख कुमार भण्डारी र अस्पतालका कार्यकारी अध्यक्ष डा. एन. शर्मा, कार्यकारी निर्देशक डा. मुझ श्रेष्ठ तथा मेडिकल डाइरेक्टर डा. निराजन सुवेदीले हस्ताक्षर गर्नुभएको छ।
