काठमाडौँ । राष्ट्रिय जनगणना २०७८ ले हिमाली र मध्यपहाडी भेगका नागरिकको औसत आयु अन्य भेगभन्दा उच्च रहेको तथ्य सार्वजनिक गरेको छ । प्रतिवेदनअनुसार, ओखलढुङ्गाको औसत आयु ७५.३ वर्ष पुगेको छ भने रामेछाप ७५.२ वर्षसहित दोस्रो स्थानमा परेको छ ।
विज्ञहरूका अनुसार, यी जिल्लामा उच्च आयुको प्रमुख कारण प्राकृतिक वातावरण, स्वस्थकर खानपान, परम्परागत जीवनशैली र बलियो सामाजिक संरचना हुन् । तथ्याङ्क बिहीबार रामेछापको सदरमुकाम मन्थलीमा आयोजित अन्तरक्रिया कार्यक्रममा सार्वजनिक गरिएको हो । उक्त कार्यक्रम तथ्याङ्क समन्वय कार्यालय काभ्रे र राष्ट्रिय तथ्याङ्क कार्यालय थापाथली, काठमाडौँले संयुक्त रूपमा आयोजना गरेका थिए ।
प्रतिवेदनले तराईका जिल्ला र शहरी क्षेत्रमा बसोबास गर्ने नागरिकको औसत आयु तुलनात्मक रूपमा कम रहेको उल्लेख गरेको छ । स्वास्थ्य पूर्वाधारको कमी, जीवनशैली, खाद्य बानी र वातावरणीय कारक यसका कारणका रूपमा पहिचान गरिएका छन् ।
यता रामेछाप जिल्लामा आन्तरिक बसाइसराइ र वैदेशिक रोजगारीमा जानेहरूको सङ्ख्या उच्च रहेको तथ्याङ्कले देखाएको छ । हाल जिल्लाको जनसङ्ख्या १ लाख ७० हजार ३ सय २ रहेको भए पनि घट्दो क्रममा रहेको र सन् २०५१ सम्ममा १ लाखमा सीमित हुने अनुमान गरिएको छ । जन्मदर घट्नु, ढिलो विवाह, वैदेशिक रोजगारी र बसाइसराई प्रमुख कारणका रूपमा देखिएका छन् । जिल्लामा मात्र आन्तरिक बसाइसराई दर २९ प्रतिशत पुगेको उल्लेख छ ।
कार्यक्रममा सहभागी सरोकारवालाहरूले जनगणनाबाट प्राप्त तथ्याङ्कलाई स्थानीय नीति निर्माण, विकास योजना र स्वास्थ्य पूर्वाधार विस्तारमा मार्गदर्शकका रूपमा उपयोग गर्नुपर्नेमा जोड दिएका थिए । कार्यक्रममा शिक्षक, विद्यार्थी, कर्मचारी र पत्रकारहरूको उपस्थिति रहेको थियो ।
