रामेछाप, वैशाख २५ । नेपाली काँग्रेस रामेछापको कार्यवाहक सभापतिको जिम्मेवारी हालका उपसभापति नवराज थोकरलाई दिइएको छ । पार्टीको केन्द्रीय समितिले पत्र पठाउँदै थोकरलाई कार्यवाहक सभापतिको जिम्मेवारी दिएको हो ।
जिल्ला सभापति पूर्णबहादुर तामाङ (कान्छाराम) माथि पार्टी अनुशासन सम्बन्धी कारवाही भएपछि केन्द्रीय समितिले उक्त निर्णय गरेको जनाइएको छ । पार्टीको जिल्ला संगठन सञ्चालन, नियमित बैठक, समन्वय तथा संगठनात्मक गतिविधि अघि बढाउने जिम्मेवारी थोकरलाई दिइएको स्रोतले जनाएको छ ।
नेपाली काँग्रेसको विधान अनुसार जिल्ला सभापति अनुपस्थित वा जिम्मेवारी निर्वाह गर्न नसक्ने अवस्था आएमा उपसभापतिले कार्यवाहक सभापतिको भूमिका निर्वाह गर्ने व्यवस्था रहेको छ । सोही व्यवस्था अनुसार केन्द्रले थोकरलाई जिम्मेवारी तोकेको बताइएको छ ।
कार्यवाहक सभापतिको जिम्मेवारी पाएपछि थोकरले पार्टी संगठनलाई एकताबद्ध बनाउँदै आगामी गतिविधिलाई प्रभावकारी रूपमा अघि बढाउने बताएका छन् । उनले पार्टीका नेता तथा कार्यकर्तालाई आपसी समन्वय र सहकार्यका साथ संगठन सुदृढीकरणमा लाग्न आग्रह गरेका छन् । पार्टीभित्रको आन्तरिक व्यवस्थापन, अनुशासन र संगठनात्मक गतिविधिलाई थप व्यवस्थित बनाउने उद्देश्यसहित केन्द्रले निर्णय गरेको जिल्ला नेताहरूको भनाइ छ ।
